“Könlüm keçir Qarabağdan” – Bakı metrosunda yeni layihə
“Metropolitenin qalereyası” QSC “Metro Gallery” layihəsi çərçivəsində vətəndaşlara növbəti sərgini təqdim edəcək.
Bu barədə 1news.az-a "Bakı Metropoliteni” QSC-nin mətbuat xidmətinin rəhbəri Bəxtiyar Məmmədov açıqlama verib:
“Gənclik stansiyasının keçidlərində “Metro Gallery” adlı növbəti lakin xüsusi bir sərgi başlanacaq. “Könlüm keçir Qarabağdan” foto-sərgisi işğaldan azad edilən və hər birimizin qürur mənbəyi olan “Zəfər tarixi”nin əks-sədası kimi Qarabağımızın, Şərqi Zəngəzurumuzun rayonlarına, bölgələrinə həsr edilib.
Bu sərgi Qarabağımızda başlanan böyük quruculuq işlərinə keçid xarakteri olacaq. Ötən 50-60-cı illərin ab-havasını hər birimizə yaşatmaqla, xüsusi ovqat yaradacaq. Əlbəttə həmin ərazilərdə yaşamış insanların da xüsusi diqqətini cəlb edəcək. Ümumi deyim ki, bu bir başlanğıcdır. Bu sərginin davamı olacaq”.
Qeyd edək ki, foto-sərgi 24 sentyabr tarixindən “Gənclik” stansiyasının keçidlərində nümayiş olunacaq. Ümid edirik ki, Milli Arxiv idarəsinin nadir fotolarından ibarət olan unikal sərgiyə heç kim biganə qalmayacaq.
Aytən Sakitqızı
