“Başını dizlərimə qoyub “Bura mənim istirahətimdir” deyirdi” - Şəhid anası
“Başqa analar oğullarını çayxanadan çağıranda, mən onu məcbur edirdim ki, get dostlarınla vaxt keçir, gəzintiyə çıx”.
1news.az-ın məlumatına görə bunu 24 yaşında şəhidlik zirvəsinə ucalan Əhmədov Amal Rauf oğlunun anası Mehriban Əhmədova deyib. O, bildirdi ki, Amal heç vaxt özünə vaxt ayıra bilmirdi:
“Amal çox yorğun olurdu, həmişə başını dizlərimə qoyub deyirdi ki, bura elə mənim istirahətimdir”
Qeyd edək ki, 3 may 1996-cı ildə Rusiyanın Tver şəhərində doğulan Amal Əhmədov 2002-2013-cü illərdə Gəncə şəhərində 6 nömrəli tam orta məktəbdə təhsil alıb. 2013-cü ildə Gəncə Texniki Kollecinə daxil olub. 2014-cü ildə təhsilini dayandıraraq hərbi xidmətə yollanıb. 10 yaşından atasını itirən Amal daha sonra ailənin bütün yükünü çiyinlərində daşıyıb. Sentyabrda Vətən müharibəsinə yollanan Amal Cəbrayılda, Füzulidə döyüşüb. 13 oktyabr 2020-ci ildə Füzuli uğrunda gedən döyüşlərdə qəhrəmancasına şəhid olub. Azərbaycan Respublikasının Prezidenti İlham Əliyevin sərəncamları ilə "Vətən uğrunda", "Döyüşdə fərqlənməyə görə", "Füzulinin azad olunmasına görə" medalları ilə təltif olunub.
Aytən Sakitqızı
