Qızını məktəbə aparmaq üçün hər gün çiyninə alıb çaydan keçirirdi, ordumuz köməyə çatdı - FOTO

Astara rayonunun Miki kəndində övladını məktəbə aparıb-gətirmək üçün hər gün ayaqyalın çaya girən kənd sakini Fuad Salayevin bu problemi həll olunub.

1news.az-ın “Qafqazinfo”ya istinadən məlumatına görə, artıq həmin çayın üzərində körpü çəkilib.

Bu, Azərbaycan Ordusunun mühəndis istehkamçılarının dəstəyi ilə baş verib. Belə ki, çayın üzərində körpü funksiyasını yerinə yetirən həm şəxsi heyət, həm də hərbi texnikanın hərəkəti üçün nəzərdə tutulmuş keçid quraşdırılıb.

Qeyd edək ki, buna qədər qızını çiynində məktəbə aparıb-gətirməli olan Fuad Salayevin özü də Miki kənd orta məktəbində texnologiya müəllimi işləyir. O, bu problemlə 2006-cı ildən çayın kənarındakı evə köçdüyü gündən üzləşib.

Kənd müəllimi bir neçə gün öncə “Qafqazinfo”ya açıqlamasında bildirmişdi ki, dəfələrlə Astara Rayon İcra Hakimiyyətinə qəbula getsəm də, karantin dövrü olduğunu əsas gətirərək icra başçısı ilə görüşə şərait yaradılmayıb. İcra Hakimiyyəti problemi bələdiyyənin üstünə atıb. Bələdiyyədən də büdcədə pul olmadığını bildiriblər.

“Mənim özümün burada körpü tikməyə imkanım yoxdur. Çayın aşağı keçidində ancaq mənim evim var, yuxarı keçiddə isə eyni vəziyyətdə olan 7 ailə var”, - deyə F.Salayev bildirmişdi.

Problemlə bağlı Miki kəndinin də daxil olduğu Siyaku kənd bələdiyyəsinin sədri Ramin Dədəyev isə həmin çay üzərində körpünün inşası üçün təxminən 1000 manata yaxın vəsait lazım olduğunu bildirmişdi.

“Bələdiyyənin isə büdcəsində bu tikinti ilə bağlı vəsait yoxdur”, - R.Dədəyev bildirmişdi.