Peyvəndləmənin yeni növ mutasiyaya təsiri varmı? - RƏSMİ AÇIQLAMA
Məlum olduğu kimi, ölkəmizdə Covid-19 virusuna yoluxma yenidən 2000-ni üstələdi. Bu azmış kimi virusun yeni mutasiyası - AY.4.2( eyvay) sürətli şəkildə yayılmağa başlayıb.
1news.az-ın məlumatına görə ekspertlər deyir ki, koronavirusun bu növü "delta" ştamı ilə müqayisədə daha çox yoluxdurur. Sürətli şəkildə yayılan bu mutasiyada bir şəxs bir neçə saniyədə 10 nəfərə yaxın adamı yoluxdurur. Ölkəmizdə ciddi şəkildə peyvəndləmə aparılsa da, virusa yoluxma artan dinamika ilə inkişaf etməkdədir. Hətta yoluxanların sayı sağalanların sayından üstündür. Belə olan halda da mütəxəssislər həyəcan təbili çalır.
Məsələyə münasibət bildirən baş infeksionst Təyyar Eyvazov 1news.az-a açıqlamasında qeyd etdi ki, mövcud vəziyyət 3-cü doza vaksinin sürətləndirilməsini zəruri edir:
“Peyvəndləmə virusa qalib gəlmə yolunda növbəti addımdır. Xəstəlik keçirən insanlarda və ya iki dəfə vaksin olunan şəxslərdə bir müddət sonra qanda virusa qarşı qoruyucu anticismlərin sayı azalır. Bu, sağlam və xəstə insalarda fərqlidir. Yəni yaş və vaxt faktorları fərqli olur. İmmunitetin ilkin olaraq əmələ gəlməsi və onun davam etmə müddəti fərqlidir. Amma vaksin olunmaq mütləqdir. Müşahidələrimiz göstərir ki, vaksin xəstəliyin ağırlaşmasının qarşısını alır”.
Baş infeksionist onu da qeyd etdi ki, hazırda mövsümlə əlaqədar olaraq qrip xəstəliklərinin sayı da artıb:
"Koronavirus infeksiyasına yoluxan şəxslər bunun adi qrip olduğunu düşünüb məsuliyyətsiz davranırlar. İctimai nəqliyyatdan istifadə edib dükan və marketlərə daxil olurlar. Çölə çıxmaqla ətraf aləmlə birbaşa təmasda olurlar. Bu da təbii ki, virusun yayılma riskini daha da artırır.
Koronavirusun əlamətləri digər qrip xəstəliklərinin əlamətləri ilə demək olar ki, oxşardır. İstənilən halda hansısa şəxsdə bu əlamətlər varsa, mütləq koronavirus testi verməli və təcrid olunaraq müalicə almalıdır. Onu da deyim ki, insanlar təcrid olunmaqdan qorxmamalıdırlar. Çünki Covid-19-dan qorunmaq qaydaları eyni ilə qrip, zökəm kimi xəstəliklərdən qorunmaq kimidir”.
TƏBİB-in Elmi-Tədqiqat Profilaktika İnstitutunun elmi işlər üzrə direktor müavini Akif Qurbanov da deyir ki, bundan sonrakı mərhələrədə də yeni mutasiyaların olması qaçılmazdır:
“Hazırkı mutasıyaya “Covid-19" virusunun mutasiya edilmiş forması olan "Delta plyus" ştamı deyilir, yəni " ikiqat mutasiya. İkiqat mutasiyada virus daha tez yayılır və orqanizmdə anticismlərə qarşı müəyyən rezisdentlik göstərir. Növbəti mutasiyaların olması da qaçımazdır. Çünki "Covid-19" virusları mutasiyaya meyillidirlər. Hazırda sürətlə yayılan xəstəliyin daha çox uşaqlarda müşahidə olunması və xəstəlik simptomları, ağırlıq dərəcəsi haqqında müzakirələr aparılır. Deyim ki, bu barədə təsdiqlənmiş elmi məlumat olmasa da, istər müalicə, istər profilaktika tədbirləri eynidir. Xüsusilə vurğulamq istəyirəm ki, ekspertlər belə bir qənaətə gəliblər ki, hazırda istifadə olunan vaksinlər AY.4.2 və ya "Delta plyus" ştamına qarşı effektivliyini qorumaqdadır".
Hər halda ehtiyatlı olmalı və sevdiklərimizi qorumaq naminə ilk öncə özümümzü qorumalı və qaydalara əməl etməliyik. Unutmayaq ki, biz təkcə koronavirusla deyil, paralel olaraq onun mutasiyaya uğrayan ağır növləri ilə də mübarizə aparırıq. Gözə görünməyən düşmənlə müharibədə qələbə qazanmağımız üçün peyvənd olunmağımız da vacib məsələlərdən biridir.
Aytən Sakitqızı