1 saylı cəzaçəkmə müəssisəsində Amnistiya Aktı icra edilib - FOTO

Prezident İlham Əliyevin təşəbbüsü ilə Milli Məclis tərəfindən “8 Noyabr – Zəfər Günü münasibətilə amnistiya elan edilməsi haqqında” Qərarın icrası həyata keçirilir.

1news.az xəbər verir ki, KİV-lərin iştirakı ilə bu gün ilk olaraq Amnistiya Aktı 1 saylı cəzaçəkmə müəssisəsində həyata keçirilib.

Ədliyyə Nazirliyinin mətbuat xidmətinin rəisi Aynur Sabitova bildirib ki, 1 saylı cəzaçəkmə müəssisəsində 19 məhkuma Amnistiya Aktı şamil olunub.

Onlardan 9-nun sənədi hazırdır, digərlərinin sənədi isə gün ərzində hazır olacaq.

Bu gün ümumilikdə cəzaçəkmə müəssisələrində 114 məhkum azadlığa buraxılacaq.

Aynur Sabitova bildirib ki, dekabrın 1-dək amnistiya 1787 məhkuma şamil edilib: "Onlardan 34-ü qadın, 2-i yetkinlik yaşına çatmayandır, 60 nəfər isə 60 yaşına çatmayan şəxslərdir. 1391 məhkum bu günə kimi azad edilib. Onlardan 1203 məhkum cəzaçəkmə müəssisəsindən azad edilib. 368 məhkum isə məntəqə tipli cəzaçəkmə müəssisəsindən azad edilib.

Qeyd edək ki, Zəfər Günü münasibətilə hazırlanmış Amnistiya Aktı barəsində tətbiq olunması nəzərdə tutulan şəxslərin sayına, cinayətlərin və cəzaların əhatə dairəsinə görə Azərbaycan tarixinin ən böyük amnistiyası olacaq. Amnistiya Aktının 15 min nəfərdən çox insana, o cümlədən 70-dək qadına və yeniyetməyə şamil olunması gözlənilir.

Foto: Nadir İbrahimli