Metroda sərnişinlərin sənədləri niyə yoxlanılır? - RƏSMİ CAVAB
Koronavirus pandemiyasının davam etməsi, eləcə də ölkəmizdə bu virusun “Omikron” ştammının aşkarlanması pandemiya qaydalarına daha ciddi riayət etməyimizi tələb edir.
Lakin təəssüf ki, heç də hamı bu fikirdə deyil. Bəzi şəxslər isə virus daşıyıcısı ola-ola insanların çox olduğu ictimai yerlərə getməkdən belə çəkinmirlər. Bu da təhlükəsizlik tədbirlərinin daha da gücləndirilməsini zəruri edir. Buna görədir ki, Bakı Metropoliteninin bəzi stansiyalarında sərnişinlər polis əməkdaşları tərəfindən yoxlanıldıqdan sonra stansiyaya daxil olurlar. Nə qədər qəribə olsa da bu haldan narazı olanlar da var.
Məsələ ilə bağlı 1news.az-a danışan Daxili İşlər Nazirliyinin Mətbuat Xidmətinin KİV və ictimaiyyətlə əlaqələr şöbəsinin rəisi Elşad Hacıyev da bildirdi ki, Metropolitenin bəzi stansiyalarında vətəndaşların sənədlərinin yoxlanılmasında məqsəd vətəndaşların təhlükəsizliyinin qorunması, virusun yayılmasının qarşısının alınmasıdır. Onun sözlərinə görə, aktiv koronavirus xəstələrinin ictimai yerlərə çıxması, metropolitenin bəzi stansiyalarına yaxın ərazilərdə yaşayan aktiv koronavirus xəstələri ilə bağlı polis orqanlarına daxil olmuş siqnallar üzrə müvafiq profilaktik tədbirlərin keçirilməsi daim diqqətdə saxlanılır və metropolitenin bəzi stansiyalarında sərnişinlərin yoxlanılması zərurəti yaranır:
“Hansısa vətəndaşın, Metropolitendən istifadə edən şəxsin sənədləri o zaman yoxlanılır ki, hansısa bir hüquqazidd hal var. Ancaq indiki halda aktiv koronavirus xəstələrinin ictimai yerlərdə, xüsusən də metrostansiyalara daxil olması ilə bağlı məlumatlar daxil olduqda həmin stansiyalarda ciddi yoxlamalar aparılır ki, virus daşıyıcısı olan şəxslər müəyyən olunsun və müalicə təyin olunan ünvana qaytarılması təmin edilsin”.
Şöbə rəisinin sözlərinə görə, ötən il ancaq metropolitenin girişində və stansiyalarında koronavirus daşıyıcısı olan 50-yə yaxın şəxs saxlanılaraq müalicə təyin olunan ünvanlara qaytarılması təmin edilib:
“Aşkar olunan koronavirus xəstələri müxtəlif bəhanələr gətirməklə məsuliyyətdən yayınmağa çalışırlar. Onlar barəsində müvafiq araşdırmalar aparılır. Əgər başqa şəxsləri yoluxdurublarsa, insanların çox olduğu yerlərə daxil olublarsa və infeksiya riski ilə bağlı təhlükəli vəziyyət yaradıblarsa cinayət qanunvericiliyinə uyğun olaraq məsuliyyətə cəlb olunurlar və barələrində istintaq hərəkətləri aparılır. Bir daha vətəndaşları pandemiya ilə bağlı təhlükəsizlik qaydalarına ciddi riayət etməyə, aktiv koronavirus xəstələrini isə yüksək infeksiya riski şəraitində metropolitenə və ictimai nəqliyyata daxil olmamağa çağırırıq”.
B.Cahandarov
