Oğurluq dəmir barmaqlıqları alan metal qəbulu məntəqəsinin sahibi istintaqa cəlb edilib

Xəzər rayonunda Buzovna-Zaqulba yolunun kənarında yağış sularının axıdılması üçün nəzərdə tutulan 136 ədəd dəmir barmaqlığın oğurlanması ilə bağlı istintaq tədbirləri davam etdirilir.

Daxili İşlər Nazirliyinin mətbuat xidmətindən 1news.az-a bildiriblər ki, yanvarın 1-dən 5-dək olan müddətdə baş verən oğurluq hadisəsi barədə müvafiq dövlət qurumundan polisə daxil olan şikayətdə yol infrastrukturuna ümumilikdə 18 min manata yaxın maddi ziyan dəydiyi qeyd edilib.

Həmin hadisəni törətməkdə şübhəli bilinən Şahin Şəfaqətov Xəzər Rayon Polis İdarəsinin və 2-ci Polis Şöbəsinin əməkdaşları tərəfindən keçirilən əməliyyat-axtarış tədbiri nəticəsində saxlanılıb. Aparılan araşdırmalar zamanı müəyyən edilib ki, həmin şəxs oğurladığı dəmir barmaqlıqları şəxsi avtomobili ilə metal qəbulu məntəqələrindən birinə apararaq orada satıb. Əməliyyat tədbirlərinin davamında Şahin Şəfaqətovun dəmir barmaqları satdığı metal qəbulu məntəqəsinin sahibi Toğrul Musayev də saxlanılıb. O, ifadəsində oğurluq dəmir barmaqlıqları aldığını etiraf edib.

Toğrul Musayev barəsində Xəzər Rayon Polis İdarəsinin istintaq şöbəsində Cinayət Məcəlləsinin 194-cü (Cinayət yolu ilə əldə edildiyini bilə-bilə pul vəsaitlərini və ya digər əmlakı əldə etmə, onlara sahiblik və ya onlardan istifadə etmə, yaxud sərəncam vermə) maddəsi ilə cinayət işi başlanıb.

Oğurluqda iştirakı olan digər şəxsin saxlanılması istiqamətində istintaq-əməliyyat tədbirləri davam etdirilir.