Bakıda olan rus təşkilatlarına 30 apreldə “Georgi lenti” aksiyası keçirməyə icazə verilib? - AÇIQLAMA

Bir müddət əvvəl Azərbaycanın Rus Gəncləri Assosiasiyası İctimai Birliyi Bakıda yerləşən Rus Evinin dəstəyi ilə aprelin 30-da "Georgi lenti" aksiyası keçirəcəyini bəyan etmişdi.

Aprelin 30-u Azərbaycan Dövlət Neft Akademiyasında (indiki adı: Azərbaycan Dövlət Neft və Sənaye Universiteti) törədilən terrorun qurbanlarının anım günü olduğu üçün, aksiyanın həmin gündə keçirilməsi və ümumiyyətlə Rusiyanın Ukraynada törətdikləri ilə bağlı sosial şəbəkələrin Azərbaycan seqmentində elan ciddi narazılıqla qarşılanıb.

Məsələ ilə bağlı 1news.az-a danışan Daxili İşlər Nazirliyinin Mətbuat Xidmətinin rəisi Ehsan Zahidov aksiya keçirmək üçün Bakı Şəhəri İcra Hakimiyyətinə müraciət edilməlidir.

“Bakı Şəhər İcra Hakimiyyətindən müvafiq cavab verməlidir. Əgər onlara icazə verilərsə, polis əməkdaşları aksiyanın təhlükəsizliyini təmin edər. İcra hakimiyyəti tərəfindən icazə verilməsə, aksiya keçirilməsini məqsədəmüvafiq hesab etməsə, o halda həmin aksiya qanunsuz hesab olunur. Belə olan halda aksiyanın keçirilməsi yolverilməsdir”.

Bakı şəhər icra hakimiyyətindən 1news.az-a bildirilib ki, Azərbaycanın Rus Gəncləri Assosiasiyası İctimai Birliyi tərəfindən aksiya keçirməklə bağlı müraciət olunmayıb.

Qeyd edək ki, elan həm “Rus evinin”, həm də Azərbaycanın Rus Gəncləri Assosiasiyası İctimai Birliyinin sosial şəbəkə hesablarından pozulub. Həmin ekran görüntülərini təqdim edirik.

Xatırladaq ki, "Georgi lenti" aksiyasi 2005-ci ildən etibarən Rusiya hökuməti tərəfindən beynəlxalq səviyyədə keçirilir.

Aksiya öz adını 1769-cu ildə Rusiya çariçası İkinci Yekaterinanın göstərişi ilə təsis edilən Müqəddəs Georgi Ordenindən götürüb.

2005-ci ildən sonra isə "Georgi lenti" aksiyası daha çox İkinci Dünya Müharibəsində 9 May qələbəsinin simvolu kimi göstərilib.