Azərbaycanlı rejissorun “Balıqlara Xütbə” filminin dünya premyerası İsveçrədə olacaq
Hilal Baydarovun "Balıqlara Xütbə" filminin dünya premyerası müəllif kinosunun paytaxtı İsveçrədə, Lokarno Film Festivalının əsas müsabiqəsində olacaq.
1news.az xəbər verir ki, bu barədə "Ucqar Film"-dən məlumat verilib.
Bildirilib ki, bu il 75-cisi keçiriləcək Lokarno Film Festivalında "Balıqlara Xütbə" “Qızıl Bəbir” mükafatına namizəddir. Film 3500 film arasından seçilmiş 17 filmdən biridir. Film Azərbaycan, Meksika, İsveçrə və Türkiyənin birgə istehsalıdır.
Bütün iradə və əzmimizlə hər il yeni üfüqlərə, ucqarlara yelkən açmağa can atdıq!
2019-cu ildə Dünyanın bir çox nüfuzlu festivallarında göstərilən və Visions du reel'də "Məxsusi Jüri", Sarayevo Film Festıvalının baş mükafatı "Sarayevonun Ürəyi" və bir neçə başqa önəmli mükafat qazanan "Xurmalar Yetişən Vaxt" ...
Sənədli kino tariximizin ən böyük uğuru, dünyanın ən böyük sənədli film festivalı IDFA-nın əsas müsabiqəsində göstərilən "Ana və Oğul" ...
2020-ci ildə
Kino tariximizin ən böyük uğuru - Venesiya Film Festivalının əsas müsabiqəsində göstərilən "Səpələnmiş Ölümlər Arasında" ...
2021-ci ildə
Tokio Film Festivalında "Sənətə Ən Yaxşı Töhfə" mükafatına layiq görülən "Durna Çırağı"...
və nəhayət 2022 -ci ildə
"Balıqlara Xütbə" filminin Lokarno Film Festivalının əsas müsabiqəsində premyerası olacağı xəbəri bizləri və bütün kinosevərləri sevindirdiyi şübhəsizdir!
Bu və bura sığmayan bütün uğurlar təkcə "Ucqar Film"in deyil, hamımızındır! Bu böyük uğurlara görə hər kəsi və bütün kinosevərləri təbrik edirik!
Rollarda: Rəna Əsgərova, Orxan İskəndərli, Hüseyn Nəsirov
Rejissor: Hilal Baydarov
Senari: Hilal Baydarov, Aysu Akcan
İstehsalçı: Elşən Abbasov, Hilal Baydarov, Carlos Reygadas
Birgə İstehsalçı: Dan Wechsler, Jamal Zeinal-Zade, Andreas Roald, Emil Nəcəfov, Faruk Güven, Emrah Kılıç, Joaquín Del Paso
Görüntü rejissoru & Montaj: Hilal Baydarov
Bəstəkar: Kənan Rüstəmli
Səs naxışı: Christian Giraud
Tərtibatçı: Babək Otrok" - deyə, məlumatda qeyd olunub.
