PAŞA Holding Ağdamın dirçəlişinə töhfə verməyə davam edir - VİDEO
2020-ci ildən etibarən, fiziki və ya hüquqi şəxs olmasından asılı olmayaraq, ölkəmizin bütün nümayəndələrinin əsas məqsədləri arasında əsas yerlərdən birini Azərbaycan Respublikasının işğaldan azad olunmuş ərazilərinin bərpası və yenidən qurulması, eləcə də sözügedən ərazilərdə dayanıqlı iqtisadiyyatın formalaşmasına töhfə vermək təşkil edir.
Ölkənin aparıcı holdiqlərindən olaraq PAŞA Holding ilk gündən bu sahədə fəaliyyətləri ilə fərqlənir və hazırda bu fəaliyyətini davam etdirir.
“PAŞA Holding və onun maliyyə törəmə şirkətləri Heydər Əliyev Fondu tərəfindən icra olunan 3 layihənin icrasına dəstək göstərir. Bu layihələr çərçivəsində Ağdam rayonunda yerləşən infrastruktur nümunələrinin də bərpası və konservasiyası nəzərdə tutulub. Bunlar arasında Ağdam Cümə məscidi və Qiyaslı kənd məscidinin bərpası, eləcə də yeni tikililərin tikilməsi və ətraf ərazinin abadlaşdırılması prosesləri yer alır” - PAŞA Holding-in Korporativ kommunikasiyalar üzrə baş mütəxəssisi Aytac Muxtarzadə bildirib.
Qeyd edək ki, Ağdam Cümə məscidinin bərpası istiqamətində artıq bir sıra əhəmiyyətli işlər görülüb. Belə ki, İlkin inşaat zamanı tikintidə istifadə olunmuş materialların analizi aparılıb; Məscidin içində torpaq qatının bərpası işləri yerinə yetirilib. İbadət otağının duzsuzlaşdırılması işləri aparılır, eləcə də Bərpa materiallarının təchizatı və sahəyə çatdırılması işləri hazırda aparılmaqdadır. Bundan əlavə, layihə çərçivəsində Ağdam rayonu, Qiyaslı kənd məscidinin bərpası və konservasiyası, yeni tikililərin inşası və ətraf ərazinin abadlaşdırılması da həyata keçirilir.
Qeyd edək ki, Ağdam rayonunda aparılan bərpa proseslərinin 2023-ci ilin iyun ayında tamamlanması planlaşdırılır.
