Şəhidlərin dəfnində dini şüarların səsləndirilməsi kimə və nəyə xidmət edir? - ŞƏRH
Son günlərdə sosial şəbəkələrdə şəhidlərin dəfn mərasimi zamanı dini şüarların səsləndirməsi əhali arasında etiraza səbəb olub.
1news.az xəbər verir ki, bir sıra sosial şəbəkə istifadəçiləri bu haldan narahat olduqlarını, İranın ideologiyasına xidmət etdiyini qeyd ediblər.
Bəzi tanınmış şəxslərin, sosial şəbəkə istifadəçilərinin paylaşımlarını təqdim edirik:
Məsələ ilə bağlı 1news.az-a danışan Milli Məclisin deputatı Ceyhun Məmmədov bildirib ki, şəhidlərin dəfn mərasimində bu cür aksiyaların yaxşı qarşılanmır.
“Təəssüf ki, şəhidlərin dəfnində kimlərsə siyasi məqsədlər üçün istifadəyə cəhd edirlər. Bu gün Azərbaycanda bütün dinlərin, məzhəblərin fəaliyyətinə imkan verilir. Azərbaycanın əhalisinin dinə böyük inamı, etiqadı, əhli-beytə böyük sevgisi var.
Bu halların qarşısını almaq üçün din siyasətimizi təkmilləşdirməliyik. Bu gün Azərbaycan dövlətinin qarşısında duran ən mühüm məsələlərdən biri də dini təhlükəsizliyimizin təmin edilməsidir. Əgər biz bu kimi məsələlərə həssas, diqqətlə yanaşmasaq, sonrakı dövrdə çox ciddi çətinliklər çəkəcəyik.
Bir-iki nəfərin öz dini inacından dolayı şüarlar səsləndirməsi başadüşüləndir. Amma 150-200 gəncin bir dəfn mərasimində iştirakı hansı təsadüfi hal ya öz istəyi ilə ola bilər?!
Dövlət olaraq dinin əleyhinə deyilik. Mən özüm də ilahiyyatçıyam. Amma ölkəmizdə dini siyasiləşməməyini istəyirik. Dinin əsas hədəfi məqsədi insanlara saflıq, təmizlik, ədalət təbliğ etməkdir. Şəhid dəfn mərasimlərində hamısında təşkil olunmuş o cür şüarlar səsləndirən qrupların rəhbərləri vardı. Burada siyasi məqsəd olmamalıdır. Bu gün də əsas məğz budur”.
İlahiyyatçı Elşad Miri isə, bu cür hərəkətlərin dində ayrı-seçkilik salmaq olduğunu dedi:
“Bu cür şüarlar səsləndirmək bir növ ayrıseçkilik salmaq, qruplaşma yaratmaqdır, məzhəb fərqləri qoymaqdır. Həm də təəssüflər olsun ki, İran kimi ölkələrin ideologiyasına xidmət etməkdir. Ona görə bu cür məsələlərdən yayınmaq daha məqsədə uyğundur. Bir də bəzi ölkələrdə olduğu kimi həqiqətən də şəhidlərin dəfni ilə bağlı müxtəlif prosedurlar var həmin o prosedurlar həyata keçirilərsə, bu məsələlərə heç ehtiyac da qalmaz. Təbii ki, bundan sonra istəmərik şəhid dəfni olsun, amma olsa da qeyd etdiyim kimi dəfn etmək daha məqsədə uyğun olar”.
Məsələyə Daxili İşlər Nazirliyi də münasibət bildirib. Bununla əlaqədar mətbuatın sorğusuna cavab olaraq DİN-in Mətbut Xidmətinin bölmə rəisi Zeyni Hüseynov deyib:
"Bir sıra sosial şəbəkə istifadəçiləri öz səhifələrində postlar paylaşaraq şəhidlərimizin dəfni zamanı sanki naməlum istiqamətdən yönəldilmiş bir qrup şəxsin mərasimlərə qatılaraq səs-küy salmaları və dini şüarlar səsləndirmələrini narahatlıqla qeyd edərək hüquq mühafizə orqanlarından belə şəxsləri həmin mərasimlərə buraxmamağı xahiş edirlər. Sosial şəbəkələrdəki qeyd olunan müraciətlərin müəlliflərinə vətəndaş mövqeyi sərgilədikləri üçün təşəkkür edir və onların narahatlıqlarını anlayışla qarşılayırıq.
Bildirim ki, şəhidlərimizin dəfni zamanı ərazidə ictimai asayişin qorunmasını həyata keçirən polis əməkdaşları orada baş verənləri müşahidə edirlər. Sadəcə, dəfn mərasimində hər hansı bir insidentin baş verməməsi üçün yersiz səs-küy qaldıran həmin şəxsləri oradan uzaqlaşdırmırlar. Lakin, mərasimlər başa çatdıqdan sonra qeyd olunan şəxslərin ətrafında müvafiq araşdırmalar aparılaraq tədbirlər görülür” - deyə, o əlavə edib.
Aynurə Xudaverdiyeva
