Umayra Tağıyeva: “Havanın temperaturunun anomal gedişi gözlənilir”
Son günlər davam edən və dekabr ayı üçün nisbətən mülayim hava şəraitindən sonra bu gecədən, yəni 19-dan 20-ə keçən gecədən başlayaraq respublikanın şimal və şərq rayonlarında, 20-də isə gün ərzində əksər rayonlarda havanın yağıntılı keçəcəyi, dağlıq və dağətəyi rayonlarda qar yağacağı gözlənilir.
Bunu 1news.az-a açıqlamasında Ekologiya və Təbii Sərvətlər Nazirliyinin Milli Hidrometeorologiya Departamentinin direktoru Umayra Tağıyeva deyib.
"Proses şimal küləyini güclənməsi ilə müşayiət olunacaq. Əsasən Kür vadisi rayonlarında, eyni zamanda Bakıda və Abşeron yarımadasında bu axşamdan başlayaraq şimal-qərb küləyi 15-20, gecəyə doğru isə 25 metrə qədər güclənməsi proqnozlaşdırılır.
Sabah gün ərzində bəzi yerlərdə küləyin maksimal sürəti 30-33 metrə qədər çatacaq.
Havanın temperaturunun anomal gedişi gözlənilir. Gecə saatlarında havanın temperaturu 6-7 dərəcə , sabah günorta saatlarında isə cəmi 4 dərəcə isti olacaq. Bu da küləyin güclənməsi və soyuq atmosfer cəbhəsinin ölkə ərzisindən keçməsi ilə bağlıdır. Proses qısa müddətlidir. Respublikanın yağıntılar ayın 21-də gündüz tədricən kəsiləcək. Bakıda və Abşeron yarımadasında havanın tutqun keçəcəyi, arabir yağıntılı olacağı gözlənilir. Ayın 21-də yağıntılar səhər saatlarında kəsiləcək.
Respublikanın dağlıq və dağətəyi rayonlarında şaxtalı hava şəraiti ilə bağlı gecə saatlarında 10-15 dərəcə, gündüz saatlarında 3-7 dərəcə şaxta olacağı gözlənilir. Qarın yağması nəticəsində yolların buz bağlayacağı ehtimalı var".
