Dərmanların keyfiyyətinə və qiymətinə necə nəzarət olunur? - “Çıxışa doğru”da MÜZAKİRƏ

Laboratoriyada təqdim edilən dərman vasitələri nümunələrinin tərkibi və digər keyfiyyət parametrləri istehsalçı tərəfindən təqdim edilən normativ sənədlərə əsasən yoxlanılır.

Ölkədə istehsal olunan dərman vasitələrinin hər seriyasının nümunəsi də dərman vasitələrinin keyfiyyətinin yoxlanılması laboratoriyasında yoxlanılır. Müvafiq laborator yoxlamalar aparıldıqdan sonra dərman vasitəsinə sertifikat verilir.

Farmakonəzarət sistemi - dərman vasitələrinin effektivliyi və təhlükəsizliyi üzərində dövlət nəzarətinin həyata keçirilməsi məqsədilə dərman vasitələrinin istifadəsi zamanı yaranan əlavə təsirlərin və digər arzuolunmaz nəticələrin aşkarlanması, qiymətləndirilməsi və qarşısının alınması sahəsində görülən tədbirlərin məcmusunu müəyyənləşdirir.

1news.az-ın məlumatına görə AzTV-nin “Çıxışa doğru” verilişində "Dərmanların keyfiyyətinə və qiymətinə necə nəzarət olunur?" mövzusunda aparılan müzakirələr zamanı bu barədə ətraflı danışılıb. Verilişin qonaqları Elvin Nağıyev - Səhiyyə Nazirliyi Analitik ekspertiza mərkəzinin əczaçılıq müfəttişliyi şöbəsinin müfəttişi, Mətin Bədəlov - İqtisadiyyat Nazirliyinin sektor müdiri, Ayaz hüseynov - Hemofiliyalı Xəstələrin Respublika Assosiasiyasının idarə heyətinin sədri, Eyyub Kərimli - "İqtisadi və Sosial Araşdırmalar" ictimai birliyinin sədri, iqtisadçi və Azad Məmmədov - Antiinhisar və İstehlak Bazarına Nəzarət Dövlət Xidməti, İstehlak bazarına nəzarət şöbəsinin aparıcı məsləhətçisi, mövzu ətrafında müzakirə aparıblar.

“Çıxışa doğru” verilişini bütöv şəkildə Azərbaycan Televiziyasının “YouTube” kanalından izləyə bilərsiniz: