Bu dəfə “Novruz mühazirəsi”nə Zəngilanın Ağalı kəndi ev sahibliyi etdi - FOTO
Elm və Təhsil Nazirliyinin təşkilatçılığı ilə martın 10-da Zəngilan rayonunun Ağalı kəndində “Novruz mühazirəsi” mövzusundə tədbir keçirilib.
1news.az-ın əməkdaşının da iştirak etdiyi tədbirdə tədbirdə Elm və Təhsil Nazirliyinin rəhbərliyi və əməkdaşları, Milli Məclisin deputatları, tanınmış elm və ictimai xadimlər, media nümayəndələri iştirak ediblər.
Tədbiri açıq elan edən əməkdar incəsənət xadimi, yazıçı-dramaturq, publisist Elçin Hüseynbəyli bu tarixi günə görə bütün şəhidlərimizə, Ali Baş Komandana borclu olduğumuzu qeyd edib.
Elm və təhsil nazirinin müavini Firudin Qurbanov çıxışında 44 günlük Vətən müharibəsində Ali Baş Komandan, Prezident İlham Əliyevin “Dəmir yumruğ”u ətrafında sıx birləşən ordumuzun rəşadəti sayəsində qazanılan qələbədən danışıb.
Nazir müavini “Novruz mühazirəsi”nin işğaldan azad olunan Zəngilanda keçirilməsinin tarixi əhəmiyyətini də diqqətə çatdırıb. Həmçinin 38 il sonra ilk dəfə Zəngilana gəldiyini də deyib. O, “Novruz mühazirələri”nin ənənə halı aldığını və Ağalıda ilk dəfə keçirilən mühazirənin gənc nəslə vətənpərvərlik, milli-mənəvi dəyərlərin aşılanması baxımından faydalı olduğunu bildirib.
Daha sonra Tarix İnstitutunun direktoru professor Kərim Şükürov “Qələbədən Böyük Qayıdışa” mövzusunda mühazirə söyləyib.
Professor mühazirədə 44 günlük müharibədə ölkəmizin əldə etdiyi Qələbə haqqında geniş məlumat verib, Ulu Öndər Heydər Əliyevin uzaqgörən siyasəti, Prezident İlham Əliyevin bu siyasəti davam etdirməsi nəticəsində ölkəmizin zəfərə nail olduğunu qeyd edib.
Milli Məclisin deputatları Aydın Mirzəzadə və Ceyhun Məmmədov “Novruz mühazirələri”nin Ağalıda təşkil olunmasının vacibliyindən söz açıblar. Qalib xalqın nümayəndəsi olmağın qüruru və məsuliyyəti haqqında danışıblar.
Aydın Mirzəzadə Vətən müharibəsinə həsr etdiyi kitabları Ağalı kənd məktəbinə hədiyyə edib.
Mühazirədən sonra Ağalı kəndində “Heydər Əliyev – 100” kampaniyası çərçivəsində ağaclar əkilib.
Yekunda tonqal ətrafında musiqi nömrələri səsləndirilib, Mirzə Fətəli Axundzadənin “Hekayəti Müsyö Jordan həkimi-nəbatat və dərviş Məstəli şah cadükuni məşhur” əsəri peşəkar aktyor heyəti tərəfindən canlandırılıb.
