“Qarabağ Universitetinin yaradılması çox mühüm və önəmli bir qərardır” - Ceyhun Məmmədov

“Belə bir universitetin yaradılması çox mühüm və önəmli bir qərardır”.

Bunu Milli Məclisin deputatı Ceyhun Məmmədov Xankəndi şəhərində Qarabağ Universitetinin yaradılması ilə bağlı 1news.az-a açıqlamasında deyib.

“Uzun müddətdir, Azərbaycan cəmiyyətində bu məsələ ilə bağlı müzakirə aparılır. Cənab Prezident Azərbaycan xalqının növbəti arzusunu yerinə yetirdi və belə bir universitet yaratdı. Bu həm tarixi ədalətin bərpa olunması, həm Azərbaycan həqiqətlərinin dünya ictimaiyyətinə çatdırılması, həm də Qarabağın dirçəldilməsi və Qarabağa qayıdışın sürətləndirilməsi, eləcə də bölgələrimizdə təhsilin gücləndirilməsi baxımından xüsusi əhəmiyyət daşıyan bir məsələdir”.

Deputat qeyd edib ki, bu gün belə bir universitetin yaradılmasına ehtiyac var idi və bu universitet artıq yaradıldı.

“Ümid edirik ki, bu universitet beynəlxalq müstəvidə tanınmış kifayət qədər nüfuzlu bir universitet ola bilər. Biz bu gün texniki, həndəsi və tibb sahələrinə daha çox önəm verməliyik. Eyni zamanda burada ixtisas məsələsində bölgədə aparılan quruculuq işlərində ən çox ehtiyac duyulan sahələr üzrə mütəxəssislər yetişdirilməlidir ki, gələcəkdə qarşımıza qoyduğumuz məqsədlərə nail ola bilək”.

Xatırladaq ki, Prezident İlham Əliyev 28 noyabr 2023-cü il tarixində “Qarabağ Universitetinin yaradılması haqqında” Sərəncam imzalayıb.