DİN, məktəb və BŞTİ məktəbli qızın etdiyi qeyri-etik hərəkətlərlə bağlı məlumat yaydı: “Nəzarətə götürülüb”

Sosial mediada məktəbli qızların başqa bir məktəbliyə qarşı qeyri-etik davranmalarına dair görüntülər yayılıb.

1news.az xəbər verir ki, ​​məsələ ilə əlaqədar Daxili İşlər Nazirliyinin Mətbuat Xidmətindən bildirilib ki, videogörüntülərdən məlumatlıdırlar:

"Sözügedən hadisə nəzarətə götürülüb. Hazırda araşdırma gedir, iş üzrə ekspertiza təyin olunub. Araşdırmaların nəticəsindən asılı olaraq müvafiq tədbirlərin görülməsi təmin olunacaqdır",- sorğuya cavabda qeyd olunub.

156 nömrəli məktəbdən 1news.az-a bildirilib ki, 156 nömrəli məktəbin XI sinif şagirdi (müvafiq səbəbdən şagirdin adı qeyd olunmur) yanvarın 17-si məktəbdən kənarda 2023-cü ildə IX sinifdən məzun olmuş qıza qarşı uyğunsuz hərəkətlər edərək videoya çəkiblər.

Qeyd olunub ki, məktəb rəhbərliyi və psixoloq tərəfindən şagird və valideyni ilə söhbət aparılıb, müvafiq tədbirlər görülüb. Valideyn tərəfindən hüquq-mühafizə orqanlarına müraciət olunub, aidiyyəti üzrə şagird və valideynlərin izahatları alınıb, araşdırma davam edir.

Bakı şəhəri üzrə Təhsil İdarəsindən bildirilib ki,paytaxtdakı 156 nömrəli tam orta məktəbin XI sinif şagirdinin (müvafiq səbəblərə görə adı qeyd olunmur) 2023-cü ildə məktəbin IX sinfindən məzun olmuş qıza qarşı məktəbdən kənarda etdiyi uyğunsuz hərəkətlər ilə bağlı məsələ nəzarətə götürülüb.

Araşdırmanın nəticələri barədə əlavə məlumat veriləcək.