Nərimanov rayonunda ağaclara edilən “sui-qəsd”in qarşısı alınıb - Nazirlikdən AÇIQLAMA - FOTO
Qızmar yay günlərində günəşin nəfəskəsən şüalarından qorunmaq istəyərkən bizə ilk yardım əlini uzadan, sözsüz ki, ağaclar olur.
Lakin yeri gələndə cəmiyyətimiz də onlara əl uzadır. Bəziləri su vermək, budamaq üçün, bəziləri isə dibinə bəlğəm tüpürmək, siqaret kötüyü və zibil atmaq üçün...
Elə bu “humanist” əllərdən biri də N. Nərimanov rayonu, Əliyar Əliyev və Mirzə Uluqbəy küçələrinin kəsişməsindəki ağaclara uzanmışdı. Belə ki, 23 may tarixində redaksiyamıza sözügedən yerdəki ağacların dibinə yaxınlıqda yerləşən tikinti materialları satılan yerdən zəhərli tullantıların atılması və Bakıda onsuz da "iki cüt- bir tək" qalan ağacların qurumağa sövq edilməsi ilə bağlı müraciət daxil olub.
1news.az məsələ ilə bağlı Ekologiya və Təbii Sərvətlər Nazirliyi ilə əlaqə saxlayıb.
Nazirlikdən bildirilib ki, Nərimanov rayonu, Əliyar Əliyev və Mirzə Uluqbəy küçələrinin kəsişməsindəki ərazidə ağacların dibinə inşaat tullantılarının tökülməsi ilə bağlı Dövlət Ekoloji Təhlükəsizlik Xidmətinə daxil olan şikayət araşdırılıb və fakt təsdiqini tapıb.
Xidmət rəsmisi Rəvan Teymurov bildirib ki, Xidmətin əməkdaşlarının nəzarəti altında Bakı şəhər Yaşıllaşdırma Təsərrüfatı Birliyinin işçiləri tərəfindən ağacların dibi tullantılardan təmizlənib, torpaq qatı dəyişdirilib və onlara aqrotexniki xidmət göstərilib.
