Polis Yasamalda vətəndaşın evinə zərər vuran şirkətin söküntü işlərini dayandırıb - VİDEO
Sosial şəbəkərlərdə Yasamal rayonu B.Şahtaxtinski küçəsində şirkət tərəfindən vətəndaşların evinin sökülməsi ilə bağlı görüntülür yayılıb.
İddia olunur ki, söküntü “Delux” şirkəti tərəfindən həyata keçirilir.
Bəs görəsən iddia olunan məsələ ilə bağlı hansısa tədbirlər görülürmü?
Məsələ ilə bağlı Daxili İşlər Nazirliyinin Mətbuat Xidmətindən 1news.az-ın sorğusuna cavab olaraq bildirilib ki, Yasamal rayonu B.Şahtaxtinski küçəsində yaşayış evlərinə tikinti şirkətlərindən biri tərəfindən zərər vurulması ilə bağlı daxil olan məlumat üzrə araşdırma aparılır.
DİN-in Mətbuat Xidmətindən bildirilib ki, iyulun 5-də saat 00:49 radələrində vətəndaş N.Nəcəfzadə DİN-in 102 Zəng Mərkəzinə ərazidə tikinti aparan MTK tərəfindən evlərdə yaşayış olduğu halda evlərin sökülməsi barədə məlumat verib. Məlumatla bağlı polis əməkdaşları həmin ünvanda razılıq olmadan bir neçə mənzilin divarlarına zərər vurulmasını müəyyən ediblər.
Vətəndaşın müraciəti əsasında söküntü işləri aparan şirkətin işləri dayandırılıb.
Faktla bağlı prosessual araşdırmalar davam etdirilir. Araşdırmanın nəticəsindən asılı olaraq əmələ hüquqi qiymət veriləcəkdir.
Dövlət Şəhərsalma və Arxitektura Komitəsindəndən 1news.az-ın sorğusuna cavab olaraq bildirilib ki, məsələ onların səlahiyyətində deyil.
