MSK parlament seçkilərində “exit-poll” keçirmək üçün iki təşkilatı qeydə alıb
Sentyabrın 1-də keçiriləcək Milli Məclisə seçkilərdə “exit-poll” keçirmək niyyətində olan qurumların müraciətlərinə baxılıb.
1news.az “Seçki 2024” Müstəqil Media Mərkəzinə istinadən xəbər verir ki, Mərkəzi Seçki Komissiyasının (MSK) bu gün keçirilən iclasında Komissiya sədrinin müavini Rövzət Qasımovun bildirib ki, MSK uzun illərdir seçkilərdə təşkilatlara “exit-poll” üçün şərait yaradır.
R. Qasımov bildirib ki, MSK-ya müraciət edən Vətəndaşların Əmək Hüquqlarını Müdafiəsi Liqası ABŞ-dan olan tərəfdaşı (ORACLE ADVISORY GROUP) ilə birlikdə seçkilərdə “exit-poll” keçirmək niyyətindədir.
“Tərəqqi” Sosial Tədqiqatlar İctimai Birliyi isə SWG S.P.A Tədqiqatlar Şirkəti (İtaliya) ilə birgə “exit-poll” keçirmək üçün MSK-ya müraciət edib.
Müraciətlər səsverməyə çıxarılıb və qəbul edilib.
Qeyd edək ki, qanunvericiliyə əsasən Mərkəzi Seçki Komissiyası (MSK) tərəfindən “exit-poll” keçirmək niyyətində olan təşkilatların akkreditasiya üçün təqdim etdikləri sənədlər səsvermə gününə ən azı 20 gün qalanadək qəbul edilir.
“Milli Məclisə növbədənkənar seçkilərin keçirilməsi üzrə əsas hərəkət və tədbirlərin Təqvim Planı”nda bu müddət 2024-cü il avqustun 12-dək nəzərdə tutulmuşdu.
