Yalçın Rəfiyev: Bakı “COP”unda gözlənti iqlim sahəsində inkişaf edən ölkərə edilən yardımın artırılmasıdır
“Bakıda keçiriləcək COP29-dən gözlənti iqlim sahəsində inkişaf etməkdə olan dövlətlərə ayrılan yardım vəsaitini artırmaqdır”.
1news.az xəbər verir ki, bunu COP29-un baş danışıqçısı, Azərbaycanın xarici işlər nazirinin müavini Yalçın Rəfiyev deyib.
O, bildirib ki, 2009-cu ildə Kopenagendə keçirilmiş “COP" zamanı belə bir qərar qəbul edilmişdir ki, illik əsasda inkişaf etmiş dövlətlər iqlim fəaliyyəti sahəsində inkişaf etməkdə olan dövlətlərə 100 milyard ABŞ dolları məbləğində yardım etməlidirlər.
“Bu yardımlar qrantlar, təmənnasız yardım şəklində olmalıdır. Bu il Bakıda keçirilək COP-dan əsas gözlənti bu 100 milyardın yeni yuxarı hədəfinin müəyyənləşdirilməsidir. Çünki artıq qərarın qəbul edilməsinin üzərindən 15 il keçib, dünya iqtisadiyyatı dəyişib, tələblər, ehtiyaclar dəyişib, dövlətlərin də buna uyğun imkanları dəyişib” .
“Bakı COP-u artıq qərar verməlidir ki, inkişaf etmiş dövlətlər 15 ildən sonra, daha doğrusu, gələn ildən - 2025-ci ildən etibarən illik əsasda inkişaf etməkdə olan ölkələrə nə qədər yardım etsinlər” - deyə Y. Rəfiyev əlavə edib:
“COP29 sədrliyi olaraq biz bu istiqamətdə bütün dövlətlərlə yaxından işləyirik. Danışıqlar prosesinə hazırlıq gedir. İndidən mövqelərdə artıq müəyyən qədər aydınlıqlar var. Bunu ortaq nöqtəyə gətirib konsensusa çatdırmaq üçün strategiyanın üzərində çalışırıq” - deyə Y. Rəfiyev əlavə edib.
