İCAAP rəsmisi: Səsvermə prosesi boyunca hər hansı bir mənfi hal və ya məhdudiyyətlə rastlaşmadıq
“Sentyabrın 1-də keçirilən parlament seçkilərinin ən mühüm özəlliyi işğaldan azad edilmiş ərazilərdə 54 seçki məntəqəsində təşkil olunmaqla ilk dəfə baş keçirilməsidir”.
1news.az xəbər verir ki, bunu Asiya Siyasi Partiyalarının Beynəlxalq Konfransının (İCAAP) nümayəndəsi, Türkiyənin hakim Ədalət və İnkişaf Partiyasının (AKP) xarici əlaqələr üzrə sədr müavini İbrahim Halil Korkmaz deyib.
Onun sözlərinə görə, Xankəndi başda olmaqla azad edilən torpaqlarda təxminən 50%-lik seciçi fəallığı müharibədə qazanılan zəfəri taclandırdı.
“Seçki günü səsvermə prosesinin saat 08:00-da başlamasından sonra ICAPP nümayəndə heyəti olaraq iki qrupa ayrıldıq və prosesi müşahidə etmək üçün müxtəlif seçki dairələrində ümumilikdə 16 seçki məntəqəsinə ziyarətlərimizi tamamladıq.
Bazar günü istirahətinə və həddindən artıq isti havaya baxmayaraq, yüksək iştirakın müşahidə edildiyi səsvermə prosesinin müəyyən edilmiş proqrama və Mərkəzi Seçki Komissiyasının prosedurlarına uyğun olaraq səmərəli şəkildə aparıldığını müşahidə etdik. ICAPP heyəti, səsvermə prosesi boyunca seçicilərə və seçki bülletenlərinə qarşı hər hansı bir mənfi hal və ya məhdudiyyətlə rastlaşmayıb.
Seçki boyunca müşahidəçilər öz vəzifələrini peşəkar şəkildə yerinə yetirmiş və yüksək həssaslıqla hərəkət etmişlər. Vətəndaşların səs verməsi üçün tam hazırlıq görüldüyünü müşahidə etdik”.
