Köməyə çağırış: İkiaylıq körpə ölümlə mübarizə aparır, əməliyyatı üçün üç min manata ehtiyacı var - FOTO

Körpə Hüseynin yardımsevər şəxslərin dəstəyinə ehtiyacı var.

Bu barədə 1news.az-a onun anası Yasəmən Əhmədova məlumat verib.

O bildirib ki, övladı iyunun 21-də dünyaya gəlib:

"İyunun 21-də mənim əkiz övladlarım Hüseyn və Həsən dünyaya gəliblər. Həsənin sağlamlığı yerində olsa da, Hüseynin vəziyyəti ağır olaraq doğulub. Ana bətnində olanda onun bağırsaqlarının çöldə olduğunu müşahidə etdik. Həkimlər belə uşağın tam sağlam doğulub, əməliyyatla normal həyata qayıda biləcəyini dedilər. Lakin Hüseyn doğulanda biz onun qarın divarının digər anadangəlmə inkişaf qüsuru olduğunu və dəqiqləşdirilməmiş spina-bfida xəstəliyi olduğunu öyrəndik. Hüseynin cinsiyyət orqanı tamamilə parçalanıb, onun cinsiyyətinin hamiləlik dövründə oğlan olduğu deyilmişdi".

Gənc ana övladının əməliyyatı üçün maddi dəstəyə ehtiyacları olduğunu deyib:

"Hüseyn dünyaya gələndə onun 10 gündən artıq yaşamayacağını dedilər. Amma şükür ki, o artıq iki aydan çoxdur ki, həyatla mübarizə aparır. Bir çox həkimlərə müraciət etsək də, demək olar ki, heç biri bizi qəbul etmədi. Tək bir həkim bizi qəbul edib, o da Hüseynin ilk əməliyyatı üçün 15 min manat lazım olduğunu deyib. Hazırda bu məbləğin cəmi 12 min manatını toplaya bilmişik. Ayın 21-i oğlum 3 aylıq olacaq. Həkim ayın 21-ə kimi əməliyyat edilməli olduğunu deyib. Yoldaşım sürücü işləyir, özüm isə evdar qadınam. Yardımsevər şəxslərdən mənim övladıma dəstək olmalarını xahiş edirəm".

Ailə ilə əlaqə: (055) 562-56-05.

Azərbaycan Beynəlxalq Bankı: 5522 0993 6875 6086