CodeForFuture — İT sahəsində Azərbaycan tələbələrinin uğura gedən yolu
#CodeForFuture layihəsi Azərbaycan Respublikası Elm və Təhsil Nazirliyinin “Code Academy” və Beynəlxalq Riyaziyyat və Proqramlaşdırma Məktəbi “Alqoritmika” ilə əməkdaşlığı çərçivəsində 2021-ci ildən etibarən Azərbaycanda İT təhsilinin inkişafına töhvə verməkdədir.
Bu müddət ərzində 5000-dən çox tələbə #CodeForFuture dərslərində iştirak edib və rəqəmsal sektor üçün zəruri bacarıqlara yiyələnib.
2024-cü il 28 oktyabr tarixində #CodeForFuture layihəsi çərçivəsində Azərbaycan Dövlət Pedaqoji Universitetinin 4 və 5-ci kurs tələbələri üçün Bakı Avropa Liseyinə tur təşkil edilib. Tədbir vasitəsilə 14 tələbə müasir təhsil texnologiyaları ilə tanış olub, rəqəmsal bacarıqlara dair mühazirələrdə iştirak edib və tədris prosesini izləyiblər. Bu görüş tələbələrə real şəraitdə tədris prosesini müşahidə etmək, uşaqlarla işləmək üzər praktiki təcrübə qazanmaq və təhsil prosesinə yaxından bələd olmaq imkanı yaradıb.
Layihə çərçivəsində keçirilən silsilə tədbirlər Azərbaycan Dövlət Neft və Sənayə Universitetində davam edib. Belə ki, 5 və 22 noyabr tarixlərində baş tutan görüşlərdə ölkənin qabaqcıl İT mütəxəssisləri: “PAŞA Sığorta” şirkətinin Baş sistem administratoru Rəsul Rəsulzadə və həm xarici, həm də yerli şirkətlərdə 10 ildən çox təcrübəyə malik Babək Nağıyev tələbələrlə görüşüblər. Bu görüşlər tələbələrin peşəkar inkişafı üçün mühüm addım olub. İştirakçılar İT sənayesinin mütəxəssisləri ilə birbaşa ünsiyyət quraraq cari trendlər, innovasiyalar və karyera imkanları ilə bağlı məlumat əldə ediblər. Bunlarla yanaşı, xaricdə iş imkanları, uzaqdan işlərə müraciət etmədən əvvəl görüləcəklər və beynəlxalq bazarda tələb olunan bacarıqlar haqqında ətraflı məlumat təqdim edilib. Mütəxəssislər öz təcrübələrini bölüşərək bu sualları cavablandırıb və peşəkar bacarıqların inkişafı üçün tövsiyələr veriblər.
2024-cü ilin yekun tədbiri isə 6-8 dekabr tarixlərində keçiriləcək “Code8” hakatonu olacaq. Azərbaycan Respublikasının Elm və Təhsil Nazirliyi və “Code Academy”nin dəstəyi ilə baş tutacaq tədbirdə Bakı Dövlət Universiteti, Azərbaycan Texniki Universiteti və Azərbaycan Memarlıq və İnşat Universitetinin tələbələri öz bilik və bacarıqlarını nümayiş etdirəcəklər. Hakatonda iştirakçılar real həyatdan götürülmüş tapşırıqları qısa zaman çərçivəsində həll edərək tərtibat və proqramlaşdırma sahəsində bacarıqlarını ortaya qoyacaqlar. Layihələr İT mütəxəssisləri tərəfindən qiymətləndiriləcək və ən yaxşı işlər innovativ yanaşmaları və yüksəkkeyfiyyətli icrasına əsasən mükafatlandırılacaq. Bu hakaton tələbələrin texnologiya sahəsində uğurlu karyeraya hazırlığı üçün vacib mərhələ hesab olunur.
#CodeForFuture layihəsi tələbələrlə peşəkarları bir yerə gətirərək Azərbaycanda yüksəkixtisaslı İT icması formalaşdırmağa davam edir. Bu təşəbbüs gənclərin uğurlu karyeralarına hazırlıq görməsinə və rəqəmsal dünyada yeni nailiyyətlər qazanmasına töhfə verir.
