Siyasi təhlilçi: “Bu səfər Almaniyanı geosiyasi risklərdən qurtarmaq siyasətinin tərkib hissəsidir”
Ötən gün Almaniya Prezidenti Frank-Valter Ştaynmayerin Azərbaycana rəsmi səfəri baş tutub. Səfər çərçivəsində Azərbaycan Prezidenti İlham Əliyev ilə Almaniya Prezidenti Frank-Valter Ştaynmayer arasında bir çox məsələlərlə bağlı müzakirələr aparılıb.
Bəs Ştaynmayerin Azərbaycana səfəri iki ölkə arasında münasibətlərə necə təsir edəcək? Almaniya Azərbaycan-Ermənistan münasibətlərinin normallaşmasında hansı rolu oynaya bilər?
Məsələ ilə bağlı 1news.az-a danışan STM əməkdaşı, siyasi təhlilçi Aqşin Kərimov deyib ki, Azərbaycan-Almaniya prezidentlərinin görüşü, mətbuata birgə bəyanat zamanı verilən mesajlar bir neçə məsələni aydınlaşdırır.
“Birincisi, Azərbaycan geosiyasi dövrün və xarakterin dəyişməsi ilə Cənubi Qafqazla bərabər Avropa regionunda da özünü əhəmiyyətli mövqelərə yerləşdirir.
İkincisi, Berlin özünü Cənubi Qafqazda yeni geosiyasi kontekstin daxilində yüksəltmək istəyir.
Üçüncüsü, Azərbaycanla Almaniya ikitərəfli iqtisadi-ticari, siyasi əlaqələrlə yanaşı, çoxtərəfli regional əlaqələrdə təhlükəsizlik və müdafiədən irəli gələn yanaşmalar tətbiq etməyə hazırdır.
Sadaladığım üç komponent üzrə qarşılıqlı hörmətə əsaslanan portfelin yaradılması Almaniyanın Azərbaycan-Ermənistan münasibətlərinə nisbətdə özünü necə aparması ilə müəyyən olunur”.
O, bildirib ki, Berlinin Bakı-İrəvan sülh gündəliyi ilə əlaqədar yanaşması regionda Azərbaycana qarşı formalaşdırılan cəbhəyə, o cümlədən Ermənistanın xeyrinə hərbi güc komponentinə dəstəkdən uzaq olmalıdır.
“Görünür ki, cənab İlham Əliyevlə almaniyalı həmkarı bu məsələdə müəyyən razılıq əldə ediblər və Almaniyanın siyasi neytrallığı bundan sonra daha böyük ölçüdə Bakının maraqları ilə uyğunlaşacaq. Başqa yandan, Azərbaycan-Almaniya münasibətləri regionda Fransanın ambisiyalarına qarşı Avropa İttifaqı daxilindən güclü maneə kimi diqqətəlayiq ola bilər. Hərçənd ki, Almaniya ABŞ ilə yanaşı, Fransa ilə də münasibətlərin inkişafını özü üçün əsas xətt kimi qeyd edir. Amma, Almaniya Cənubi Qafqazda indi daha çox Azərbaycan-Türkiyə strateji müttəfiqliyinin qurduğu arxitekturaya əsaslanan nizamı dəstəkləmək məcburiyyətini hiss edir.
Çünki Almaniya Rusiya-Ukrayna müharibəsindən dolayı əlavə yüklənmələri öz üzərindən atmaq istəyir və bunun üçün Azərbaycanın Avropanın enerji təhlükəsizliyindəki roluna diqqət yetirir. Digər tərəfdən Türkiyənin Ukraynadakı müharibə ilə bağlı yanaşmaları və onun hərbi, geosiyasi qüdrəti Almaniya üçün cəlbedicidir”.
“Beləliklə cənab Frank-Valter Ştaynmayerin Azərbaycana səfəri Almaniyanı geosiyasi risklərdən qurtarmaq siyasətinin tərkib hissəsidir” – deyə A.Kərimov əlavə edib:
“ Ehtimal ki, Azərbaycan və Almaniya prezidentləri kritik sahələr üzrə gələcək qərarlar qəbul edilərkən geosiyasi aspektlərin qarşılıqlı hörmət əsasında nəzərə alınacağı niyyətlərini ifadə ediblər.
“Bu xüsusda Azərbaycanın ATƏT-in Minsk Qrupunun ləğvi ilə bağlı Almaniyadan dəstək alacağı ehtimalları artmaqdadır.
Almaniyanın strategiyası iqtisadi risklərlə yanaşı, geosiyasi risklərin azaldılması ritorikasına əsaslanır. Buna görə də, Almaniya keçmişdə olduğundan daha çox Ermənistanın yaratdığı problemlərə daha aydın baxa bilər”.
