Heydər Əliyev prospektində baş verən ağır qəzada ölən və yaralanan var? - Bakı DYP və TƏBİB-dən açıqlama - YENİLƏNİB
Heydər Əliyev prospektində baş verən yol-nəqliyyat hadisəsi səbəbilə 2 nəfər (1 kişi, 1 qadın) Sabunçu Tibb Mərkəzinə hospitalizasiya olunub.
1news.az xəbər verir ki, bu barədə TƏBİB məlumat yayıb.
Bildirilib ki, 1974-cü il təvəllüdlü (kişi) şəxsə sol dizin kəsilmiş yarası diaqnozu təyin edilib. Hazırda müalicəsi davam etdirilir, vəziyyəti stabildir.
Döş qəfəsinin əziyi diaqnozu təyin edilən 1976-cı il təvəllüdlü (qadın) şəxsə isə zəruri tibbi xidmətlər göstərilib və ambulator müalicə üçün evə buraxılıb.
***
16:28
Heydər Əliyev prospekti ilə Ələsgər Qayıbov küçəsinin kəsişməsində baş verən yol nəqliyyat hadisəsinin detalları açıqlanıb.
Bakı şəhər Dövlət Yol Polisi İdarəsindən 1news.az-a verilən məlumata görə, "BYD" markalı nəqliyyat vasitəsinin sürücüsü idarətməni itirərək Heydər Əliyev prospekti ilə Ələsgər Qayıbov küçəsinin kəsişməsində qəza törədib.
Qeyd olunub ki, hadisə nəticəsində yalnız "BYD"-nin sürücüsü yüngül bədən xəsarəti alıb.
Eyni zamanda Heydər Əliyev Prospekti ilə hərəkət edən "Ford" və "Chevrolet" markalı avtomobillərə də zərər dəyib.
