1news.az

“Azadlıq” radiosu Ermənistan kəşfiyyatına işləyir?

23 Sentyabr saat 17:21 ~ 3 dəqiqəlik oxu 4480
“Azadlıq” radiosu Ermənistan kəşfiyyatına işləyir?

“Azadlıq” radiosunun əməkdaşlarının təmas xəttinə yaxın Azərbaycan kəndlərində Ermənistan kəşfiyyatı üçün məlumatlar toplamasına əsaslı şübhələr yaranıb.

Belə ki, “Azadlıq” radiosunun fəal döyüşlər zamanı mülki əhalinin sığınması üçün həyətlərdə yaradılan sığınacaqların yerlərinin videokadrlarını göstərməsi, koordinatlarının tapılmasına şərait yaratması, bu barədə silsilə reportajlar təqdim etməsi belə düşünməyə əsas verir.

Kadrlardan göründüyü kimi, sözügedən radionun qoşunların təmas xəttinə yaxın məntəqələrin birindən hazırladığı reportajda əhali üçün sığınacaqların qazılmasından bəhs olunur və həmin sığınacaqların görüntüsü verilir.

(Xronometraj: 07:24)

“Azadlıq” radiosunun xəbər buraxılışlarında açıq şəkildə qərəz, tərəf tutma,  jurnalistika baxımından bilərəkdən qeyri-peşəkarlıq nümayiş etdirməsinə daha bir misal. Sentyabrın 20-də Ermənistana məxsus taktiki PUA-nın məhv edilməsi xəbərini elə təqdim edir ki, sanki Azərbaycan tərəfi Ermənistan ərazisinə hücum edərək orada gərginlik yaradıb. Təqdim olunan məlumatda Ermənistan PUA-sının məhz Azərbaycan ərazisində vurulduğu isə deyilmir.

(Xronometraj: 0:08)

“Azadlıq” radiosunun reportajları sosial şəbəkə istifadəçiləri tərəfindən də böyük narazılıqla qarşılanıb. İstifadəçilərin bir çoxu sözügedən radionu dövlət sirrini yaymaqda ittiham ediblər. Həmin şərhlərdən bir neçəsini təqdim edirik.

Göründüyü kimi, sözügedən kadrlar birbaşa düşmənin maraqlarına xidmət edir. Buna görə də “Azadlıq” radiosunun, o cümlədən “Meydan TV”nin Azərbaycanda rəsmi akkreditasiyadan keçmədən “free-lancer” əməkdaşlar vasitəsilə qeyri-qanuni fəaliyyəti, Ermənistan kəşfiyyatına casusluq xidmətləri barədə ciddi ölçü götürülməlidir.

Azərbaycan dövləti xarici media qurumlarının ölkədə qanuna zidd fəaliyyətinə hüquqi qiymət verməli, onlar hüququn imkan verdiyi ən sərt şəkildə cəzalandırılmalıdır. Çünki unutmaq olmaz ki. müharibə şəraitində yaşayırıq, buna görə də Dağlıq Qarabağ münaqişəsi ilə bağlı, xüsusən də cəbhə bölgəsindən xəbər verərkən maksimum diqqətli olmalıyıq.

Xatırladaq ki, Müdafiə Nazirliyi dəfələrlə ictimaiyyət və kütləvi informasiya vasitələri nümayəndələrinə müraciə edərək Silahlı Qüvvələr haqqında məlumatlar yayarkən və cəbhə bölgəsindən reportajlar hazırlayarkən dövlət sirlərinin qorunmasına daha həssaslıqla və anlayışla yanaşmalarını tövsiyə edib. Buna baxmayaraq, görünür vəziyyət bu gün də dəyişməz olaraq qalır.

Bunun nəticəsində isə əksər hallarda düşmən kəşfiyyatı yayılan informasiyaların köməyi ilə Silahlı Qüvvələrimiz (komandanlıq, şəxsi heyət, hərbi hissələrin yerləri və s.), o cümlədən cəbhə bölgəsinə yaxın məntəqələrimiz haqqında məlumatları heç bir çətinlik çəkmədən toplamaq imkanı əldə edir.

Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “Report”a müsahibəsində sözügedən məsələyə toxunub. O, bildirib ki, ölkəmizin sosial şəbəkə seqmentində bəzi davranış və ifadə tərzi, qeyri-peşəkar və məsuliyyətsiz şərhlər, saxta və yalan məlumatların yayılması tezliyi və intensivliyi, ordunun fəaliyyəti haqqında paylaşımlar ciddi narahatlıq doğurur:

“Birmənalı şəkildə başa düşülməlidir ki, hər hansı fərdin sosial şəbəkələrdə paylaşdığı məlumat və ya xəbər yoxlanılmamış, yanlış, qərəzli və təhrikçi ola bilər. Bəzən iş o həddə çatır ki, peşəkar media araşdırmadan sosial şəbəkədə yayılmış xəbərə istinad edir.  

Qeyd olunanlar sosial şəbəkələrin müsbət tərəflərini inkar etmir. Bu problem bütün dünyada mövcuddur. İlk növbədə, ölkə ictimaiyyətində, xüsusilə gənclər arasında sosial şəbəkə maarifləndirilməsinin artırılmasına ehtiyac var. Bu da onlarda sosial şəbəkələrin zərərli təsirlərindən qorunmaq üçün intellektual immuniteti artıra bilər.

Sosial şəbəkələri təsis edən böyük şirkətlər də öz məsuliyyətlərini başa düşməli və yalnız müəyyən etdikləri süni intellektin imkanları daxilində bu problemə baxmamalı, sosial şəbəkələrdə cərəyan edən neqativ tendensiyalara qarşı effektiv tənzimləyici mexanizmlər təqdim etməlidirlər”.

1news.az

 

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News" İnformasiya Agentliyi,,
Bütün hüquqlar qorunur
entonee.net