Döyüş meydanında şücaət göstərən şəhid Vüsal Rzayev dəfn edildi – VİDEO – FOTO
Şəhid Rzayev Vüsal Tofiq oğlu. 50 gündən çox itkin olan şəhidimiz 10 dekabr 2020-ci il tarixində torpağa tapşırıldı.
1news.az xəbər verir ki, Vüsal 14 aprel 1996-cı ildə Şabran rayonunda anadan olub. 2015-ci ildə həqiqi hərbi xidmətə yollanıb. Əsgərlik zamanı hər zaman nizam-intizamı ilə fərqlənib, verilən tapşırıqları vaxtında yerinə yetirib. Hərbi xidməti dövründə 2016-cı ildə aprel döyüşlərində iştirak edib və Murov dağ silsiləsində xidmətini başa vurub.
27 sentyabr 2020-ci il tarixində başlayan Vətən müharibəsinin ilk günündən Rəşadətli Azərbaycan Ordusunun üzvü olaraq, müxtəlif döyüş tapşırıqlarını yerinə yetirib, döyüş meydanında şücaət göstərərək bir neçə məntəqənin düşmən işğalından azad edilməsində iştirak edib. 14 oktyabr 2020-ci il tarixində Füzuli istiqamətində gedən döyüşlər zamanı qəhrəmancasına şəhid olub.
Vüsal hər zaman arzu edib ki, torpaqlarımızın işğaldan azad edilməsində iştirak etsin. Şəhidimizin atası Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevə və Müzəffər Ordumuza 28 illik həsrətə son qoyulduğu üçün təşəkkür edib.
Şəhidimiz ilə vida mərasimi zamanı, Hərbi Hava Qüvvələrimizin qırıcıları Zəfər paradı üçün səmada üç rəngli bayrağımızı nümayiş etdirirdilər və bu an Vüsalın valideyinləri kədər və qürur hissini eyni anda yaşamış olduqlarını bildirdilər.
Şəhidimiz 10 dekabr 2020-ci il tarixində Xətai rayonunda yerləşən şəhidlər xiyabanında dəfn edilib.
Allah şəhidlərimizə rəhmət eləsin!
1news.az
