Tanınmış çilili jurnalist “Xocalı adlı Azərbaycan şəhərinin dəhşətli tarixi” başlıqlı məqalə yazıb
Çilidə televiziya və radio jurnalisti kimi tanınan, Santiaqonun “Andres Bello” Universitetinin professoru Markos Borkoski Paezin Çilinin “Cambio 21” xəbərlər portalında “Xocalı adlı Azərbaycan şəhərinin dəhşətli tarixi” başlıqlı yazısı dərc edilib.
1news.az-ın AZƏRTAC-a istinadla verdiyi xəbərə görə, yazı Azərbaycanın Çilidəki diplomatik missiyasının müvəqqəti işlər vəkili Orxan Hacıyevin Xocalı soyqırımının 24-cü ildönümünə həsr olunan “613” adlı məqaləsi əsasında hazırlanıb.
Məqalədə M.Borkoski O.Hacıyevlə tanış olması və onunla söhbəti əsnasında Xocalı soyqırımı barədə eşitdiyi dəhşətli faciənin təfərrüatıdan bəhs edir. Jurnalist, diplomatın sözlərinə istinadən, Xocalı soyqırımını 20-ci əsrin ən qəddar faciələrindən biri adlandırıb, bu tarixin Azərbaycanda hər il qeyd olunduğunu söyləyib.
Bildirilir ki, 1992-ci il fevralın 25-dən 26-na keçən gecə erməni hərbi birləşmələri, Xankəndidə yerləşən keçmiş sovet ordusunun 366-cı alayının köməkliyi ilə Xocalıda azərbaycanlılara qarşı etnik təmizlənmə aparıb. Soyqırımı nəticəsində 613 nəfər azərbaycanlı, həmçinin 106 qadın, 83 uşaq qətlə yetirilib.
Vurğulanıb ki, Azərbaycanın beynəlxalq səviyyədə tanınmış ərazilərinin 20 faizi Ermənistan tərəfindən işğal olunub, bir milyondan çox azərbaycanlı qaçqın və məcburi köçkün vəziyyətinə düşüb.
1news.az
