BƏƏ-nin səfiri Bakı Ali Neft Məktəbinin tələbələri ilə görüşüb – FOTO

Birləşmiş Ərəb Əmirliklərinin (BƏƏ) Azərbaycandakı fövqəladə və səlahiyyətli səfiri Məhəmməd Əhməd Hamel Alqubaisi Bakı Ali Neft Məktəbində (BANM) “BƏƏ-nin inkişafı” mövzusunda təqdimatla çıxış edib.

1news.az-a BANM-in ictimaiyyətlə əlaqələr şöbəsindən verilən məlumta görə, tədbirdə çıxış edən rektor Elmar Qasımov prezident İlham Əliyevin bu yaxınlarda Birləşmiş Ərəb Əmirliklərinə etdiyi səfəri xatırladıb.

BƏƏ ilə Azərbaycan əlaqələrinin inkişafından söz açan E. Qasımov BƏƏ-nin bir çox sahələrdə, o cümlədən memarlıq və turizm üzrə böyük inkişafa nail olduğunu vurğulayıb. Rektor BƏƏ-nin ali təhsil müəssisələri ilə BANM-in əlaqələrinin qurulduğunu deyərək, Abu-Dabi Neft İnstitutu ilə əməkdaşlığın inkişaf etdiriləcəyini deyib.

Səfir Məhəmməd Əhməd Hamel Alqubaisi özü və diplomat karyerası haqqında danışıb. Səfirin təqdimatında BƏƏ-nin inkişafını əks etdirən qısa videoçarx nümayiş olunub. O, BƏƏ-nin tarixi, coğrafiyası, ölkənin dövlət quruluşu və idarəetmə sistemi, adət-ənənələri haqqında danışıb. Səfir ölkəsinin inkişaf etmiş sahələri, təbii sərvətləri, xüsusilə təhsil sistemi haqqında məlumat verib.

Sonda səfir tələbələri maraqlandıran sualları cavablandırıb.

1news.az