Bolqarıstanın prezidenti IV Qlobal Bakı Forumunda iştirak edəcək
Bolqarıstan Respublikasının prezidenti Rosen Plevneliyev gələn ay Azərbaycana səfər edəcək.
1news.az-ın məlumatına görə, R.Plevneliyev Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə keçiriləcək IV Qlobal Bakı Forumunda iştirak edəcək.
Nəzərinizə çatdıraq ki, martın 10-11-də Bakı şəhərində keçiriləcək “Çoxqütblü dünyaya doğru” mövzusuna həsr olunan Forumda münaqişələrin qarşısının alınmasında dinlərarası dialoqun rolu, miqrasiya, multikulturalizm və inteqrasiya məsələləri, qlobal təhlükəsizliyin təmin olunmasında radikallaşma və miqrasiya amillərinin rolu müzakirə olunacaq. Bundan başqa enerji və qlobal idarəçiliyin gələcək perspektivləri ilə bağlı məsələlər də forumun gündəliyinə daxildir.
Qeyd edək ki, Bolqarıstan prezidenti ötən il keçirilmiş III Qlobal Bakı Forumunda da iştirak edib. O, Nizami Gəncəvi Beynəlxalq Mərkəzinin üzvüdür. 2015-ci ilin oktyabrında Sofiyada IV Qlobal Bakı Forumuna hazırlıq məqsədi ilə “Avropada əməkdaşlıq və qonşuluğun yeni görüntüləri” mövzusunda keçirilən konfrans cənab Rosen Plevneliyevin himayəsi ilə təşkil edilib.
1news.az
