Dünyanın aparıcı “beyin mərkəzlərinin” rəhbərləri Bakıda Azərbaycanın qlobal arenada perspektivlərini müzakirə ediblər – FOTOREPORTAJ
Bu gün Azərbaycanın müstəqilliyinin bərpa olunmasının 25-ci ildönümünə həsr edilmiş “Azərbaycanın qlobal və regional arenada rolu: Reallıqlar və perspektivlər” adlı beynəlxalq konfrans keçirilib.
Azərbaycan Respublikasının Prezidenti yanında Strateji Araşdırmalar Mərkəzinin (SAM) təşkilatçılığı ilə baş tutan konfransda Azərbaycanın dövlət rəsmiləri, Milli Məclisin deputatları, Türkiyə, ABŞ, Rusiya, İran, Qazaxıstan, Türkmənistan, Macarıstan, Gürcüstanın nüfuzlu “beyin mərkəzlərinin” nümayəndələri iştirak ediblər.
Tədbirdə ilk olaraq giriş nitqi ilə SAM-ın direktoru Fərhad Məmmədov çıxış edib.
Daha sonra Azərbaycan Respublikası Prezidenti Administrasiyasının rəhbər müavini, Xarici əlaqələr şöbəsinin müdiri, Birinci dərəcəli dövlət müşaviri Novruz Məmmədov çıxış edib.
O, öz nitqində qeyd edib ki, dövlətimizin başçısı İlham Əliyevin rəhbərliyi ilə Azərbaycan dünyaya yeni inkişaf modelini təqdim edir. Azərbaycan “qara qızıl”ı insan kapitalına çevirmək yolu ilə uğurla irəliyə gedir:
“Ötən 25 il ərzində Azərbaycan uğurlu və şərəfli yol keçib, ancaq bu müddətdə dünyanın keçdiyi yol ürəkaçan olmayıb. Ötən müddətdə ölkəmiz çətin və ağır sınaqlardan da keçib”.
PA rəsmisi öz nitqində bildirib ki, bu gün Azərbaycan balanslaşdırılmış, milli maraqlara əsaslanan xarici və daxili siyasət həyata keçirir:
“Azərbaycanın BMT Təhlükəsizlik Şurasına üzv seçilməsi ölkəmizin əldə etdiyi ən böyük uğurlardan biridir. Ölkəmiz BMT-dən sonra ən böyük təşkilat olan Qoşulmama Hərəkatına da üzv olub. Azərbaycan beynəlxalq antiterror koalisiyasına qoşularaq dünyada sülhün bərqərar olmasına öz töhfəsini verir. Azərbaycan Avropa ölkələri ilə də əlaqələri genişləndirir. Ölkəmiz, həmçinin Latın Amerikası, Afrika ölkələri ilə münasibətlərə önəm verir və bu əlaqələri inkişaf etdirir”.
Daha sonra konfrans işini birinci sessiyada Azərbaycan Respublikasının Prezidenti yanında Strateji Araşdırmalar Mərkəzinin direktor müavini Gülşən Paşayevanın sədrliyi ilə “Azərbaycan qlobal arenada: Nailiyyətlər və çağırışlar” mövzusunda davam etdirib.
Panellərdə Macarıstanın Xarici Məsələlər və Ticarət İnstitunun direktor müavini Laszlo Vasa, Rusiya Siyasi Araşdırmalar İnstitutunun direktoru Sergey Markov, Azərbaycan Respublikasının Prezidenti yanında Strateji Araşdırmalar Mərkəzinin direktoru Fərhad Məmmədov, ABŞ Ceymstaun Fondunun prezidenti Qlen Hovard, Helvan Universitetinin professoru, Azərbaycandakı Misir Mədəniyyət Mərkəzinin keçmiş direktoru Adel Darviş çıxış edib.
Rusiyanın Siyasi Araşdırmalar İnstitutunun direktoru Sergey Markov qeyd edib ki, Azərbaycanın 25 illik inkişafı heyrət doğurur, iqtisadi inkişaf baxımından yalnız Azərbaycan və Qazaxıstan postsovet ölkələrini qabaqlayıb.
SAM rəhbəri Fərhad Məmmədov öz çıxışında iştirakçıların diqqətini respublikanın xarici siyasətində çoxvektorluluğa yönəldərək qeyd edib ki, bu da ölkəmizin ona yaxın dövlətlərlə bərabərhüquqlu münasibətlərin qurulması üçün əsası yaratmağa imkan verir.
Ceymstaun Fondunun prezidenti (ABŞ) Qlen Hovard öz çıxışında Azərbaycanın siyasi əhəmiyyətinin davamlı artımını proqnozlaşdırıb.
Ölkəmizin dünya arenasında artan əhəmiyyətini Helwan Universitetinin professoru, Misir Mədəniyyəti Mərkəzinin sabiq direktoru Adel Dərviş də vurğulayıb.
Konfransın ikinci sessiyasında “Azərbaycan yolların kəsişməsində: Regional baxış” mövzusu ilə Azərbaycan Respublikasının Prezidenti yanında Strateji Araşdırmalar Mərkəzinin aparıcı elmi işçisi Gülmira Rzayevanın sədrliyi ilə keçirilib.
Bu sessiyada Türkiyə Xarici İşlər Nazirliyinin Strateji Araşdırmalar Mərkəzinin direktoru Ali Resul Usul, İran İslam Respublikasının Xarici İşlər Nazirliyinin Beynəlxalq Tədqiqat və Təhsil Mərkəzinin rəhbəri Seyed Kazem Sajjadpur, MQIMO Universitetinin PostSovet Araşdırmaları Mərkəzinin direktoru Stanislav Çernyavski, Qazaxıstan Respublikasının Prezidenti yanında Strateji Araşdırmalar Mərkəzinin direktoru Yerlan Karin, Gürcüstanın Strateji və Beynəlxalq Araşdırmalar Fondunun baş elmi işçisi Giorgi Badridze, Türkmənistanın Xüsusi tapşırıqlar üzrə səfiri Murad Nazarov, Azərbaycan Respublikasının Prezidenti yanında Strateji Araşdırmalar Mərkəzinin Xarici Siyasət Məsələlərinin Təhlili Şöbəsinin müdiri Cavid Vəliyev çıxış edib.
Konfransda son nitqlə SAM-ın direktoru Fərhad Məmmədov çıxış edib.
1news.az
