Daha bir şəhidimizin övladı dünyaya gəlib – FOTO

10:44 - 13 / 02 / 2021

Fevralın 12-də Vətən müharibəsi qəhrəmanı, Xüsusi Təyinatlı Qüvvələrin baş giziri Camal İsmayılovun oğlu dünyaya gəlib.

Bu barədə “Zəfər” Şəhid Ailələrinə Dəstək İctimai Birliyi məlumat yayıb.

Şəhidin oğluna Alparslan adı qoyulub.

Qeyd edək ki, İsmayılov Camal Vidadi oğlu XTQ-nin kəşfiyyatçısı, baş gizir idi, ömrünün 18 ilini Vətənə xidmətə həsr etmişdi. Rus, erməni və ingilis dillərini mükəmməl bilirdi. O, Doğma Qarabağımızın Füzuli, Cəbrayıl, Zəngilan şəhərlərinin, Ərgünəş yüksəkliyinin, Hadrutun qəsəbəsinin alınmasında, eləcə də Laçın dəhlizinə nəzarət edən yüksəkliyin alınmasında iştirak edib, rəhbərlik etdiyi dəstəsilə ilə birlikdə şəhidlik zirvəsinə yüksəlib. Oktyabrda Füzuli rayonunun azadlığı uğrunda gedən döyüşlər zamanı hərbçi yoldaşını xilas edərkən yaralanıb. Bir müddət cəbhədə müalicə alaraq, yenidən döyüşlərə qoşulub. Son döyüşündə 16 nəfərlik dəstəsilə 500 erməni ilə döyüşüblər, güllələri bitəndə hətta düşmənlə əlbəyaxa da vuruşublar. Elə 200 ermənini Camal təkbaşına öldürüb.

İsmayılov Camal bundan öncə də 2016-cı ilin Aprel döyüşlərində göstərdiyi şücaətə görə medal ilə təlltif edilib.

Kəşfiyatçı kimi daim öz üzərində çalışaraq dağ-xizəkçilik, paraşütdən tullanmanın bütün sirrlərini öyrənib, Azərbaycan, Türkiyə və Gürcüstanda keçirilən – “Turaz Şahini”, “Anadolu Qartalı” “Eternity-2019”, “Anatolian Sofex-2018” və bir çox təlimlərində iştirak edərək çoxlu sertifikat, tərifnamələrə layiq görülüb.

Ali Baş Komandan İlham Əliyevin müvafiq sərəncamı ilə Camal İsmayılova ölümündən sonra “Vətən Müharibəsi Qəhrəmanı” adı verilib. Həmçinin, dövlət başçısının digər sərəncamları ilə C.İsmayılov “Vətən Müharibəsi Qəhrəmanı”, “Vətən uğrunda” və “Cəbrayılın azad olunmasına görə” medalları ilə təltif edilib.