“Əli və Nino” kitab mağazasının təsisçisindən deputata sərt CAVAB
"Əli və Nino" Kitab Mağazaları Şəbəkəsinin təsisçisi Nigar Köçərli Milli Məclisin iclasında onu ittiham edən deputat Kamal Cəfərliyə cavab verib.
1news.az Nigar Köçərlinin öz “Facebook” hesabında yazdığı statusu təqdim edir:
“Milli Məclisin deputatı Kamal Cəfərov deyir ki, oğurluq ictimai xətadır, cinayət əməli deyil. İnzibati qaydada çıxarılan tənbeh növü deyil? Kim deyir, o cəzanı biz çıxarmışıq? Kim deyir, o şəkilləri biz çəkib yaymışıq? Bu çox gülünc və yersiz ittihamlardır".
“İndi isə hadisəni izah edim” – deyə, N. Köçərli əlavə edib:
“Bir həftə əvvəl Fəvvarələr meydanındakı mağazamızda oğurluq baş verib. Hələ oğurlanan malların maddi dəyəri bəlli olmadan, mağazanın qarşısında satıcımız kitab oğurlayanları saxladıqda onlar kobudluq göstərib, işçimizi itələyib, götürdükləri kitabların bir neçəsini atıb aradan çıxıblar. Onların kobudluğu və qaçması səbəbindən satıcılarımız polisə müraciət ediblər və polis əməkdaşları (çox təşəkkür edirəm) bu məsələni dərhal nəzarətə götürüblər. Aparılmış əməliyyat-axtarış nəticəsində polislər bu insanları saxlayıb məhkəməyə təqdim ediblər. Ötən həftənin 5-ci günü məhkəmə olub, hakim onları yerində azadlığa buraxıb və bununla da məsələ bizim tərəfimizdən qapanıb.
Dünən polis bu haqda öz qaydalarına əsasən mətbuatda məlumat yayıb. Polisin mətbuatla əlaqəsi və hansı xəbəri hansı formada təqdim etməsi tamamilə polisin ixtiyarındadır və deyim ki, inanmıram, bu xəbərdə bu iki nəfəri hədəf alan qərəz, yaxud kin var. DİN saytında hər gün onlarla bu cür xəbər dərc olunur. Bu xəbər də sıradan, günlük məlumatlardan biri kimi yazılıb.
Sadəcə, bu məsələ xəbər saytlarında və sosial şəbəkələrdə maraq doğurduğu (kitab və oğurluq) üçün belə səs-küyə səbəb olub.
Deyim ki, mənim özümə də xoş olmayan bu vəziyyət haqda mən heç bir müsahibə verməmişəm və belə xəbərlərin tirajlanmasından kənar qalmağı seçmişəm (buna görə mənə dünəndən yazan və zəng edən media nümayəndələrindən üzr istəyirəm).
Bir insan və bir ana olaraq, həmin iki gəncin ailə üzvlərinin vəziyyətini təsəvvür edə bilirəm. İnanın ki, mənim də bü gənclərə görə ürəyim ağrıyır. Amma satıcılarımın da əməllərinə tam dəstək oluram.
Fəaliyyətimiz dövründə biz həmişə kitab təlabatı olan, fərq etməz, bizə müraciət edən, hətta etməyən, hər yerə kitablar hədiyyə göndərmişik. Həbsxanalar, uşaq inkişaf mərkəzləri, Şəhid ailələri, Qazilər, az təminatlı ailələr, tələbələr - bizə müraciət edən heç kəsi kitabsız qoymamışıq, təmənnasız kitablar hədiyyə etmişik. Və bu haqda heç yerdə məlumat verməmişik.
Amma bu məsələdə ortalıqda oğurluq faktı var. Həcmi, maddi dəyəri azdır, çoxdur, cəzası nədir, fərq etmir və bunu təyin etmək, buna hüquqi qiymət vermək bizim işimiz deyil. Bunu polis və məhkəmə özü müəyyən edir. Bizlik olsa, həmin uşaqlar o an desəydilər ki, bu kitablara ehtiyacımız var, oxumaq istəyirik, biz heç nə etmədən buna şərait yaradardıq. Necə ki, bunu dəfələrlə etmişik.
Mən həmişə bu haqda susmuşam. Yenə də susmağa davam edərdim, əgər Azərbaycan Parlamentində bu cür düşünən insanların olduğunu görməsəydim”.
Xatırladaq ki, İyunun 7-də Daxili İşlər Nazirliyinin mətbuat xidmətinin yaydığı məlumata əsasən, Bakının Səbail rayonunda yerləşən kitab mağazalarından birindən oğurluq edilib. Bildirilib ki, mağaza rəhbərliyi polisə məlumat verəndən dərhal sonra hadisəni törədən şəxslərin axtarışlarına başlanılıb. Əməliyyat-axtarış tədbiri nəticəsində oğurluq etməkdə şübhəli bilinən paytaxt sakinləri Elməddin Süleymanlı və Elvin Əhmədov saxlanılıblar. Onların mağazadan 2 ədəd kitab oğurlaması obyektin müşahidə kameraları vasitəsi ilə də lentə alınıb. Lakin gənclər məhkəmə qərarı ilə azadlığa buraxılıb.
Qeyd edək ki, deputat Kamal Cəfərov Milli Məclisin bu gün keçirilən növbədənkənar iclasında kitab mağazasından kitab oğurluğunda ittiham edilən gənclərdən danşaraq, "Əli və Nino" Kitab Mağazaları Şəbəkəsinin təsisçisi Nigar Köçərlini ittiham edib.
Ətraflı : Deputat kitab oğurluğunda ittiham olunan gənclərdən danışdı, mağaza təsisçisini ittiham etdi
