“Bizi ölümə aparan mobil telefonlar” – “Çıxışa doğru”da MÜZAKİRƏ
Həyatımızın ayrılmaz hissəsinə çevrilən, bəzilərimiz üçün hətta hava və su kimi vacib əhəmiyyət kəsb edən mobil telefonlar bir çox hallarda bizi ölümə aparır.
Bu hallardan biri sükan arxasında mobil telefondan istifadədir. Təəssüf ki, bu gün sürücülərin əksəriyyəti bu qayda pozuntusunu edir. Amma ilk növbədə özünü təhlükəyə atdığının fərqində olmur.
Qanun nə deyir?
İnzibati Xətalar Məcəlləsinin 342.6 maddəsində deyilir ki, nəqliyyat vasitəsinin hərəkəti zamanı sürücünün telefonu əldə saxlamaqla ondan istifadə etməsinə görə 50 manat cərimədir.
Ekspertlər isə hesab edir ki, sükan arxasında mobil telefondan ümumiyyətlə istifadə olunmasın. Təbii ki, bəzi zəruri hallar istisnadır. Amma unutmaq lazım deyil ki, sevdiklərimizə yazdığımız mesajlar, göndərdiyimiz səs və danışıqlar onlar üçün də, bizim üçün də sonuncu ola bilər.
1News-un məlumatına görə, AzTV-nin “Çıxışa doğru” verilişində “Bizi ölümə aparan mobil telefonlar” mövzusunda aparılan müzakirələr zamanı bu barədə ətraflı danışılıb. Verilişin qonaqları – Nəqliyyat eksperti Elməddin Muradlı, təhlükəsizlik qaydaları üzrə ekspert Elmar Nurəliyev, Bakı Şəhər Baş Polis İdarəsinin DYP baş inspektoru Araz Əsgərli və sığorta mütəxəssisi İlkin İbrahimov mövzu ətrafında müzakirə aparıblar.
“Çıxışa doğru” verilişini bütöv şəkildə Azərbaycan Televiziyasının “YouTube” kanalından izləyə bilərsiniz: