Bakıda axtarışda olan şəxs özünü partladıb, üç polis xəsarət alıb – YENİLƏNİB
Bakıda “Maşın bazarı”nda özünü partladaraq öldürən şəxsin adı məlum olub.
1news.az-ın APA-ya istinadla verdiyi xəbərə görə, qanunsuz silah saxlamaqda şübhəli bilinən, 1982-ci il təvəllüdlü, əvvəllər Cinayət Məcəlləsinin narkotik və qaçaqmalçılıq maddələri ilə məhkum olunmuş Müseyib Ələsgərov bu gün paytaxtın Səbail rayonunda idarə etdiyi avtomaşın saxlanılarkən polis əməkdaşlarına tabesizlik göstərərək qaçmağa cəhd göstərib. Bu zaman o, üzərində olan qumbara ilə özünü partladaraq öldürüb.
Avtomaşında olan sərnişini, əvvəllər Cinayət Məcəlləsinin soyğunçuluq maddəsi ilə məhkum olunmuş Eldar Qurbanov isə qaçarkən saxlanılıb.
Partlayışda 4 polis əməkdaşı müxtəlif dərəcəli bədən xəsarətləri alıb.
17:08
Bakıda axtarışda olan şəxs özünü qumbara ilə partladıb.
1news.az-ın verdiyi xəbərə görə, hadisə paytaxtın Səbail rayonu, Badamdar qəsəbəsində yerləşən “Maşın bazarı” adlanan yerdə qeydə alınıb.
Hadisə zamanı üç polis əməkdaşı xəsarət alıb.
Hüquq-mühafizə orqanları əməkdaşları hadisə yerinə cəlb olunublar.