Həkim-infeksionist COVID-19 virusunun yeni mutasiyasından danışdı: 3-cü doza vaksin vurulmalıdır
Dünyanın bir sıra ölkələrində, həmçinin qonşumuz olan Rusiya Federasiyasında COVID-19 virusunun yeni ştammı yayılmağa başlayıb.
Yeni yayılan bu mutasiya AY.4.2 adlanır. Yayılan məlumata görə, bu mutasiya növü daha sürətli yayılır.
Bəs görəsən COVID-19 virusunun yeni mutasiya olaraq adlandırılan AY.4.2-nin xüsusiyyətləri nələrdir? Bu mutasiya növündən qorunmağın yolları nələrdir?
Məsələ ilə bağlı 1news.az-ın suallarını cavablandıran həkim-infeksionist Vüqar Cavadzadə deyib ki, virusun bu mutasiyası Böyük Britaniyada yayılıb.
“Rusiya, Türkiyə, İsraildə də bu mutasiya aşkarlanıb. Britaniyanın özündə isə, AY.4.2 mutasiyasiya ümumi yoluxmanın 15 faizini təşkil edir. Yeni mutasiya elədir ki, ilk vaxtlar sürətli artım müşahidə edilir, zamanla isə zəifləməyə başlayır”.
İnfeksionist bildirib ki, yeni mutasiyaya görə təşvişə düşməyə ehtiyac yoxdur.
“Əgər bir insanın digər xəstəlikləri varsa, o koronavirusu ağır keçirir. Bunun üçün mütləq şəkildə özümüzü qorumalıyıq”.
Koronavirusdan qorunmağın yollarından danışan V.Cavadzadə bildirib ki, koronavirusdan qorunmaqla bağlı tədbirlərin başında vaksinasiya gəlir.
“Vaksinasiya daha da sürətlənməlidir. Xüsusilə da tibb işçiləri, yaşı 65-dən yuxarı olan şəxslərə 3-cü doza vaksin vurulmalıdır. Ümumiyyətlə 3-cü doza vaksini hamı vurdurması tövsiyə olunur. Eyni zamanda gigiyenik qaydalara riayət etməklə də koronavirusa yoluxma azala bilər”.
