Azərbaycana narkotik vasitələr daha çox hansı istiqamətlərdən gətirilir? - Generaldan CAVAB
“2021-ci ildə aşkar edilmiş narkoqaçaqmalçılıq faktlarının analizi qanunsuz dövriyyədən götürülən narkotiklərin 99.8 %-nin cənub sərhədlərindən keçirilməklə, əsasən Astara, Biləsuvar və Naxçıvan Muxtar Respublikası DGK Şahtaxtı gömrük postu vasitəsilə ölkəmizə gətirildiyini təsdiqləyir”.
1news.az xəbər verir ki, bunu Dövlət Gömrük Komitəsinin Əməliyyat-İstintaq Baş İdarəsi rəisinin birinci müavini, gömrük xidməti general-mayoru Güloğlan Muradlı Lənkəranda jurnalistlər üçün təşkil edilən təlimdə deyib.
"Narkoqaçaqmalçılıq faktlarının 73%-i (40 fakt), tutulan narkotiklərin 89%-i (2 t 703 kq) cənub sərhədlərində: Cənub Ərazi Baş Gömrük idarəsinin Astara və Biləsuvar gömrük postlarında, Naxçıvan MR DGK-nin Şahtaxtı Gömrük İdarəsində, 1 fakt üzrə 10,5 %-i (320,6 kq) Şimal Ərazi Baş Gömrük İdarəsinin Samur gömrük postunda, ümumilikdə isə narkotiklərin 99,5%-dən çoxu yuxarıda sadalanan 4 gömrük orqanında qanunsuz dövriyyədən götürülüb".
General-mayor bildirib ki, narkotik vasitələr və psixotrop maddələr 20 halda Azərbaycana gətirilərkən, 31 halda tranzit yolla keçirilərkən, 4 halda ölkə ərazisində saxlanıb. “Əsas marşrutlar İrandan gəlməklə Avropaya daşınması marşrutları olub”.
