Paytaxtda yeni asfaltlanan yolda baxış qapaqlarının ətrafı nə zaman düzələcək? – Agentlikdən AÇIQLAMA - FOTO
Bakı şəhəri, Nəsimi rayonu Nəcəf bəy Vəzirov küçəsi təxmini 20 gün əvvəl asfaltlansa da yolda kommunikasiya xətlərinin baxış qapaqlarının ətrafı qazılaraq yol səviyyəsindən aşağı salınıb.
Bu barədə barədə küçə sakinlərindən 1news.az-a ünvanlanan şikayətdə bildirilib.
Qeyd olunub ki, baxış qapaqlarının yol səviyyəsindən aşağıda qalması avtomobillərin hərəkətində çətinlik yaradır, bəzən isə qəzalara səbəb olur. Bundan başqa, sakinlər tərəfindən iddia olunur ki, yolun hərəkət hissəsində uzun müddətdir park edilən Daewoo Matiz markalı avtomobil küçə asfaltlanan zaman səkiyə qaldırılıb, hələ də orada dayanaraq piyadaların hərəkətinə maneçilik törədir.
Məsələ ilə bağlı 1news.az-ın sorğusuna cavab verən Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirib ki, baxış qapaqlarının aşağıda olması ilə bağlı aidiyyəti şöbəyə məlumat verilib.
“Həmin ərazidə yol təmirini həyata keçirən MMC-yə tapşırıq veriləcək, problem qısa müddətdə aradan qaldırılacaq”.
Avtomobilin səkidə saxlanmasına toxunanan A.Nəcəfli əlavə edib ki, avtomobilin səkidə olmasına Azərbaycan Avtomobil Yolları Dövlət Agentliyi cavabdeh deyil.
“Ola bilər ki, avtomobili ora kimsə sonradan gətirib qaldırıb, ancaq avtomobilin səkidə olub-olmamasına bizim qurum cavabdeh deyil”.
Həmçinin bax: Nəyə görə yol asfaltlanandan sonra kommunikasiya xətləri ilə bağlı yenidən qazılır? - VİDEO
Əsaslı şəkildə təmir olunan Bəsti Bağırova küçəsində asfalt yenidən qazıldı - FOTO
