Mənzil bazarında vəziyyət - Ukraynada baş verənlər Azərbaycanda ev qiymətlərinə necə təsir edəcək? - Ekspert

“Hal-hazırda Bakıda daşınmaz əmlak bazarında, konkret mənzil bazarında stabil bir vəziyyət müşahidə olunur”.

Bunu 1news.az-a açıqlamasında əmlak eksperti Ramil Osmanlı deyib.

“3 aylıq dinamik vəziyyətdən sonra aprel ayının xüsusilə 2-ci ongünlüyündən etibarən tədricən stabilləşmə müşahidə olunmaqdadır. Qiymətlər də qeyd etdiyim dövrdə kəskin artdı və demək olar ki, indi qiymət artımı da bir qədər stabilləşib. Yəni ümumi mənzərə bundan ibarətdir. Amma qarşıdakı aylarda nə baş verəcəyini indidən söyləmək tezdir”.

Rusiya-Ukrayna müharibəsinin Azərbaycanın mənzil bazarına təsirlərindən ddanışan R.Osmanlı deyib ki,bu müharibənin mənzil bazarına təsirləri iki istiqamətdə ola bilər:

“Bir, təbii ki, həmin ölkələrdə proses bir qədər dəqiqləşərsə, proses dərinləşərsə, bunun nəticəsində ölkəmizə axın artarsa, bu qiymət artımına gətirib çıxaracaq. İkinci istiqamət isə Ukraynanın və Rusiyanın tikinti materiallarının idxalı baxımından Azərbaycanla çox vacib tərəfdaş olması ilə bağlıdır. Yəni Azərbaycana tikinti materialları idxalında əsas pay sahibidirlər. Tikinti materiallarının qiymətlərində kəskin artım mənzil bazarında da qiymət artımına səbəb olacaq. Düşünürəm ki, Rusiya-Ukrayna müharibəsinin nəticəsi Azərbaycanda daşınmaz əmlak bazarında qiymət artımına gətirib çıxara bilər”.

Ekspert bildirib ki, fərdi həyət evləri ilə müqayisədə mənzillərdə qiymətlər daha bahadır.

“Fərdi evlərdə də qiymət artımı var. Prosesin tərkib hissəsi olaraq nəzərə almalıyıq ki, ölkədə torpaq sahələrinə olan tələbat yüksək olaraq qalır. Torpaq sahələrinə tələbin yüksək olması təbii ki, fərdi yaşayış evlərində qiymətə təsir edir. Nəzərə alsaq ki, indi tikinti baxımından mövsüm ayıdır, düşünürəm ki, qarşıdakı 1-2 ay ərzində biz fərdi yaşayış evlərinin qiymətlərində müəyyən artımlar müşahidə edəcəyik”.