Meşə ərazilərində qanunsuz fəaliyyət ilə bağlı 20-yə yaxın fakt aşkarlanıb
Ötən il meşə ərazilərində və onlara yaxın yerlərdə qanunsuz olaraq fəaliyyət göstərən ocaqxanalarla bağlı 20-yə yaxın fakt aşkarlanıb.
1news.az xəbər verir ki, bunu Fövqəladə Hallar Nazirliyinin Dövlət Yanğın Nəzarəti Xidmətinin şöbə rəisi Elnur Babayev Ekologiya və Təbii Sərvətlər Nazirliyinin feysbuk səhifəsi üzərindən canlı yayımlanan “Ekspert saatı”nda deyib.
Xidmətin şöbə müdiri bildirib ki, həmin faktlar sənədləşdirilərək baxılması üçün hüquq-mühafizə orqanlarına göndərilib: “Həmin istiqamətdə nəzarət tədbirləri davam etdirilir. Martda Qax rayonunda meşəyə yaxın ərazidə qanunsuz ocaqxana, kömür istehsalı fəaliyyəti ilə məşğul olan 16 nəfər aşkarlanıb”.
E.Babayev yay fəslinin yaxınlaşması ilə əlaqədar olaraq vətəndaşları meşə ərazilərində və onlara yaxın yerlərdə yanğın təhlükəsizliyi qaydalarına əməl etməyə səsləyib.
