Mediasiya Şurasına indiyədək daxil olan müraciətlər və barış sazişlərinin sayı açıqlandı
"Mediasiya Şurasına indiyədək 15018 müraciət olub".
1news.az xəbər verir ki, bunu Mediasiya Şurası İdarə Heyətinin sədri Nadir Adilov “Ədliyyə orqanlarında və məhkəmələrdə kommunikasiya siyasəti” mövzusunda keçirilən təlimdə çıxışı zamanı deyib. O, bildirib ki, bu müraciətlərdən 12872 ailə münasibətlərinin payına düşür.
“Burada söhbət təkcə nikahın pozulmasından getmir, burada aliment tələbindən, zinət əşyalarının alınması, övladın xaricə çıxarılması və s. məsələlərdən gedir. Ona bunu ümumi statistika şəklində veririk. Bu müraciətlərdən 395-i barışıq sazişi ilə yekunlaşıb. Bu statistikanı beynəlxalq təşkilatlar yüksək qiymətləndirsə də, bizi qane etmir, hədəflərimiz daha böyükdür. 1550 kommersiya mübahisəsindən isə 98 mübahisə barışıqla yekunlaşıb, burada çox ciddi məbləğlərin mübahisəsindən söhbət gedir. Əmək mübahisələri üzrə 596 müraciət daxil olub.
Əmək mübahisələri ilə bağlı ən böyük problemimiz ondan ibarətdir ki, işə götürənlər bəzən mediasiya prosesində iştirak etməkdən imtina edirlər. Bəzi qurumların rəhbərləri ilə görüşlər keçirmişik, onları inandırırıq ki, bu prosesə gəlməlidirlər, bu məsələlər məhkəmələrə daşınmamalıdır. Bu sahədə də nailiyyətlərimiz var. 596 işdən 75 barışıq sazişimiz olub. Gələcəkdə bu say da artacaq. Mediasiya Şurası təxminən 10 aydır fəaliyyət göstərir, yeni bir strukturdur”-deyə, N.Adilov bildirib.
