I ixtisas qrupuna hazırlaşanlar üçün "İnformatika" vəsaiti hazırlanıb
2023-cü və daha sonrakı illərdə I ixtisas qrupu üzrə ali təhsil müəssisələrinin informatikayönümlü ixtisaslarına qəbul olmaq istəyən abituriyentlər üçün "İnformatika" vəsaiti hazırlanıb.
Dövlət İmtahan Mərkəzindən 1news.az-a verilən məlumata görə, imtahanlara hazırlaşanlara elmi-metodiki kömək göstərilməsi DİM-in fəaliyyətinin mühüm istiqamətlərindəndir. Abituriyentlər, yuxarı sinif şagirdləri və müəllimlər üçün nəzərdə tutulmuş DİM-in yeni “İnformatika” vəsaiti də bu istiqamət üzrə görülən işlərin davamıdır.
Vəsaitdə qəbul proqramına daxil edilmiş bütün mövzular əhatə olunub. Burada nəzəri materialla bərabər, hər mövzunun sonunda müstəqil qiymətləndirmə tapşırıqları və bölmənin sonunda isə ümumi yekunlaşdırıcı tapşırıqlar verilib.
Vəsaitdə situasiya tipli tapşırıqlar da təklif olunurmuşdur ki, bunlar da biliklərin qazanılmasında, bacarıq və vərdişlərin formalaşmasında böyük rol oynayır. Qeyd etmək lazımdır ki, situasiya tipli tapşırıqlar fənn kurikulumunun təlim nəticələrinin yoxlanılmasına və qiymətləndirilməsinə daha yaxşı imkan verir. Belə ki, bu tipli tapşırıqlarla situasiya daxilində verilənləri görə bilmək bacarığı, qoyulmuş sualların cavablandırılması üçün tətbiqetmə vərdişləri, müxtəlif vəziyyətlərdə qərarvermə, habelə alınmış nəticələri təqdimetmə bacarıqları yoxlanılır. Situasiya tipli tapşırıqların üstün cəhətlərindən biri də müxtəlif məzmun xətlərinə aid alt standartların birgə yoxlanıla bilməsidir.
Vəsait aşağıdakı bölmələrdən ibarətdir:
1. İnformasiya və informasiya prosesləri
2. Say sistemləri
3. İnformasiyanın kodlaşdırılması və miqdarının ölçülməsi
4. Modelləşdirmə
5. Kompüterin aparat təminatı
6. Kompüterin proqram təminatı
7. Əməliyyat sistemi
8. Mətnlərin emalı
9. Elektron cədvəllər
10. Verilənlər bazası
11. Alqoritm
12. Proqramlaşdırma
13. Kompüter şəbəkələri
14. İnternet
15. Veb-proqramlaşdırma
16. İnformasiya təhlükəsizliyi
Vəsaiti iyunun 28-dən etibarən "Abituriyent" satış köşkündən (Ünvan: Bakı şəhəri, Nəsimi rayonu, A.Salamzadə küçəsi, 28, 8 Noyabr metrostansiyasının yanı), həmçinin kitab mağazalarından almaq və ya www.abiturient.az saytından sifariş etmək mümkün olacaq.
