Yeni ilə hazırlaşanların üz tutduğu yarmarkalar cibimizə uyğundurmu? - FOTO - VİDEO - REPORTAJ
Yeni ilin gəlişinə artıq sayılı günlər qalıb.
Hər il olduğu kimi bu ildə bayram münasibətilə şəhərin müxtəlif yerlərində və metrostansiyaların yaxınlığında bayram çadırları qurulub.
1news.az-ın əməkdaşı “28 May” metrostansiyasının qarşısındakı yarmarkada olub və qiymətləri araşdırıb.
Bayram yarmarkalarında şam ağacının qiyməti böyüklüyündən və formasından asılı olaraq 8 manatdan 200 manata kimi dəyişir. Şam ağacını bəzəmək üçün lazım olan oyuncaqların qiyməti isə 1-30 manat arasındadır. Zərlər hər biri 1.50 manatdan 5 manata qədərdir.
Şam ağacları üçün işıqların qiyməti isə uzunluğundan asılı olaraq 3 manatdan 30 manatadək dəyişir.
Satışda olan oyuncaq qar kürələrinin qiyməti ölçüsünə görə 3 manatdan 20 manata kimidir. Şaxta baba oyuncaqlarına gəlincə, onlar böyüklüyündən asılı olaraq 5-25 manat arasında manata satılır. 2023-cü ilin dovşan ili olması səbəbindən oyuncaq dovşanlara da tələb çoxdur. Onların qiyməti isə 2 manatdan başlayır və böyüklüyünə və keyfiyyətinə görə dəyişir.
Satıcılar alıcılıq qabiliyyətinin normal olduğunu, əsasən kiçik oyuncaqlara və yolka bəzəklərinə maraq göstərildiyini qeyd ediblər.
Yarmarkalara üz tutan paytaxt sakinləri arasında apardığımız sorğuya görə isə qiymətlərdən razı qalanlar da var, qalmayanlar da. Müşahidlərimizə əsasən deyə bilərik ki, qiymətindən ən çox narazı qalınan yeni il atributu şam ağaclarıdır.
Foto: Nadir İbrahimli
