Eyni gündə həm kədər, həm də qürur - 20 Yanvar şahidləri hadisə günündən danışır... - FOTO - VİDEO
Bu gün Azərbaycan tarixinin ən kədərli səhifələrindən biri olan 20 Yanvar günüdür.
Bakı Metropoliteni əməkdaşları 1990-cı ilin qanlı günü ilə bağlı xatirələrini 1news.az-a danışıblar.
İlham Mustafayev deyir ki, həmin gün Metropoliten təciliyardım rolunu oynayıb.
Metropolitenin digər əməkdaşı Məftun Abbasov həmin gün şəhərin alqan içində olduğunu deyir.
Ətraflı reportajımızda:
Xatırladaq ki, bundan 33 il öncə, dəqiq tarixlə desək 1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib. Bu gün, “20 Yanvar şəhidi”ləri böyük ehtiramla anılır.
1990-cı il yanvar faciəsinə aparan yol azərbaycanlıların Ermənistandakı tarixi torpaqlarından növbəti kütləvi deportasiyasının, Dağlıq Qarabağın Ermənistana birləşdirilməsi cəhdlərinin geniş vüsət aldığı 1987-ci ildən başlayıb. Artan xətt üzrə davam edən gərginliyin qarşısını almaq əvəzinə, Sovet rəhbərliyi əliyalın, silahsız Azərbaycan xalqına qarşı dəhşətli cinayət işlədib.Sovet ordusunun xüsusi təyinatlı dəstələrinin və daxili qoşunların iri kontingentinin Bakını zəbt etməsi xüsusi qəddarlıq və misli görünməmiş vəhşiliklə müşayiət edilib. Fövqəladə vəziyyətin tətbiqi əhaliyə elan olunanadək hərbi qulluqçular 82 nəfəri amansızcasına qətlə yetirib, 20 nəfəri ölümcül yaralayıb. Fövqəladə vəziyyət elan edildikdən sonra isə bir neçə gün ərzində Bakı şəhərində 21 nəfər öldürülüb. Fövqəladə vəziyyətin elan olunmadığı rayon və şəhərlərdə - yanvarın 25-də Neftçalada və yanvarın 26-da Lənkəranda daha 8 nəfər qətlə yetirilib.
Qeyd edək ki, 1990-cı il yanvar qurbanları simvolik olaraq “20 Yanvar şəhidi” adlanır. Ümumilikdə, Azərbaycanın 150 nəfər “20 Yanvar şəhidi” vardır.
