Ceyhun Məmmədov: “Repetitorluq dünyanın hər yerində var, amma heç bir yerdə bu qədər kütləvi deyil”

“Hesab edirəm ki, Azərbaycanda repetitorluq məsələsinə yenidən baxmalıyıq”.

Bunu Milli Məclisin deputatı Ceyhun Məmmədov repetitorluq və bunker müəllimlərlə bağlı 1news.az-a açıqlamasında deyib.

“Mən bu məsələyə dəfələrlə münasibət bildirmişəm. Ümumiyyətlə repetitorluq təhsilimizin qara yarasıdır. Biz bəzən tənqidi fikirlər səsləndirəndə kimlərsə repetitorluğun dünyanın hər yerində olduğunu söyləyirlər. Dünyanın hər yerində var, amma heç bir yerdə bu qədər kütləvi deyil. Təəssüf ki, bu məsələdən müxtəlif məqsədlərlə istifadə olunur. Yəni bunker müəllimlər, müəllimlərə verilən pulların miqdarı və s. ilə bağlı məsələlərin hər biri ayrılıqda diqqətlə öyrənilməli və araşdırılmalıdır. Valideynlər də həm müəllim seçimində, həm də uşaqlarının ali məktəbə hazırlıq mərhələsində diqqətli olmalıdır. Bəzi valideynlərin övladlarına çox ciddi təzyiqlər göstərdiyini görürük. Bu düzgün deyil. Əgər bunker məsələsi ilə bağlı faktlar varsa, bu faktların hər biri araşdırılmalıdır ki, gələcəkdə bu cür problemlərə yenidən şahid olmayaq”.

Deputat yeni bir sistem qurulmasının önəmini vurğulayıb.

“Eyni zamanda biz bu paralel təhsilin aradan qaldırılmasına çalışmalıyıq. Elə bir sistem qurmalıyıq ki, şagirdlərin əlavə müəllim yanına getməsinə ehtiyac duyulmasın. Bu valideynlər üçün də çox çətindir. Bəzən valideyn iki-üç övladını müəllim yanına göndərməli olur və hər biri üçün 200-300, bəzən də daha çox vəsait ödəməyə məcbur olur. Bu da valideynlərə çox ciddi bir yükdür. Bu məsələ tezliklə həllini tapmalıdır. Problem həllini tapmalıdır ki, valideynlərimiz də, şagirdlərimiz də bu prosesdən əziyyət çəkməsinlər”.

Həmçinin oxuyun:

Repetitor yanına getmədən universitetə qəbul olmaq mümkündür? - ŞƏRHLƏR