İsmayıllıda avtoxuliqanlıq edən sürücü saxlanılıb

İsmayıllı Rayon Polis Şöbəsinin Dövlət Yol Polisi Bölməsinin əməkdaşları tərəfindən keçirilən nəzarət tədbirləri zamanı avtoxuliqanlıq edərək ictimai asayişi nümayişkəranə şəkildə pozan, digər hərəkət iştirakçıları üçün təhlükə yaradan və bu kimi əməllərini sosial şəbəkələrdə paylaşan sürücü müəyyən olunaraq barəsində qanunvericiliyə uyğun tədbir görülüb.

Daxili İşlər Nazirliyinin Mətbuat Xidmətinin Şəki regional qrupundan 1news.az-a verilən məlumata görə, rayon sakini Musa Xəlilli sürücülük hüququ olmadan idarə etdiyi “VAZ-21011” markalı avtomobillə intizamsızlıq edərək yol-hərəkəti qaydalarını kobud şəkildə pozub və avtoxuliqanlıq hərəkətləri edib.

Həmin şəxs yol polisi əməkdaşları tərəfindən saxlanılıb və avtonəqliyyat vasitəsi özünün də iştirakı ilə müvəqqəti duracağa yerləşdirilib.

Musa Xəlilli barəsində İnzibati Xətalar Məcəlləsinin müvafiq maddəsi ilə protokol tərtib edilərək hüquqi qiymət verilməsi üçün rayon məhkəməsinə göndərilib.

Məhkəmənin qərarı ilə onun barəsində 500 manat məbləğində inzibati tənbeh tədbiri tətbiq olunub.

Rayon ərazisində analoji qayda pozuntusuna yol verən, vətəndaşların dincliyini və ictimai asayişi pozan sürücülərin müəyyən edilərək barələrində qanunvericiliyə uyğun tədbirlərin görülməsi məqsədilə polis əməkdaşları tərəfindən nəzarət tədbirləri gücləndirilib.