Nəsimi rayonunda norma və qaydaların pozulduğu restoranın fəaliyyəti məhdudlaşdırılıb
Paytaxtın Nəsimi rayonunda qida təhlükəsizliyi sahəsində normativ hüquqi aktların pozulduğu restoranın fəaliyyəti məhdudlaşdırılıb.
Bu barədə 1news.az-a Qida Təhlükəsizliyi Agentliyinin İnformasiya təminatı və innovativ həllər şöbəsindən məlumat verilib.
Bildirilib ki, Bakı şəhəri, Nəsimi rayonu, A.Puşkin küçəsi, ev 13 ünvanında fəaliyyət göstərən, fiziki şəxs Mehdiyev Ramal Rivan oğluna məxsus “Puşkin” restoranında antisanitar vəziyyətlə bağlı daxil olmuş məlumat əsasında Qida Təhlükəsizliyi Agentliyinin əməkdaşları tərəfindən plandankənar yoxlama keçirilib.
Baxış zamanı qida təhlükəsizliyi sahəsində normativ hüquqi aktların, sanitariya norma və qaydaların tələblərinin pozulduğu müəyyən edilib. Belə ki, qida obyektində temperaturun monitorinqi və qeydiyyatının, eləcə də müvafiq təmizlik işlərinin aparılmadığı, işçi heyətin ilkin və dövri tibbi müayinədən keçmədiyi və digər nöqsanlar aşkarlanıb.
Faktla bağlı qanunvericiliyə uyğun olaraq müəssisə rəhbərliyi barəsində inzibati protokol tərtib edilib, müəssisənin fəaliyyəti məhdudlaşdırılıb.
Agentlik əhalinin sağlamlığının qorunması və təhlükəsiz qida məhsulları ilə təmin edilməsi istiqamətində ardıcıl tədbirlərini davam etdirir.
