Cəlilabadda mənimsəmədə ittiham olunan məktəb direktorunun məhkəməsi başlayır
Cəlilabadda direktorun qanunsuz əməlləri ilə bağlı başlanmış cinayət işi məhkəməyə göndərilib.
Cəlilabad rayon prokurorluğdan 1news.az-a verilən xəbərə görə, Ocaqlı kənd 2 nömrəli tam orta məktəbin direktoru Azər Əsgərovun qanunsuz hərəkətləri ilə bağlı Baş prokuror yanında Korrupsiyaya qarşı Mübarizə Baş İdarəsində başlanaraq aidiyyəti üzrə Cəlilabad rayon prokurorluğuna göndərilmiş cinayət işinin istintaqı tamamlanıb.
Toplanmış sübutlarla Azər Əsgərovun direktor səlahiyyətlərini icra etdiyi dövrdə işə gəlməyən işçilərə və tədris olunmayan dərs saatlarına görə əmək haqqı ödənilməsi və digər qanunsuz yollarla ümumilikdə 26 min manatdan çox dövlət əmlakı olan büdcə vəsaitini mənimsəmə və ya israf etmə yolu ilə talamasına əsaslı şübhələr müəyyən edilib.
Azər Əsgərova Cinayət Məcəlləsinin 179.2.3 və 179.2.4 (qulluq mövqeyindən istifadə etməklə və xeyli miqdarda ziyan vurmaqla mənimsəmə və ya israf etmə), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham elan edilərək cinayət işi baxılması üçün Cəlilabad rayon məhkəməsinə göndərilib.
