Möhtəşəm “Baku ID” tədbirinin açılışı baş tutdu! - FOTO
27 iyun tarixlərində “Bakı Kristal Zal”da keçirilən sayca üçüncü olan “Baku ID” innovasiya festivalı böyük maraqla qarşılandı.
SABAH.HUB İnnovasiya Mərkəzinin nəzdində yaradılmış Azərbaycanın və regionun əsas startap innovasiya tədbirlərindən biri olan “Baku ID” innovasiya festivalı çərçivəsində startapçılar və investorlar bir araya gətirilmişdir.
Bu ilki “Baku ID” tədbirində 200-dən çox yerli və xarici investor, 100-dən çox xarici və yerli startap, 5000 iştirakçı və 50-dən çox tərəfdaş yer almışdır. “Baku ID” tədbiri startapların investorların diqqətini cəlb etmək üçün əvəzsiz bir fürsət oldu. Tədbir çərçivəsində “Startup Wise Guys”, “Al-Farabi Innovation Hub”, “Caucasus Ventures”, “MOST Ventures”, “Startupbootcamp”, “Idacapital”, Yıldız Tekno GSYO, Aloqa Ventures” və “SABAH.fund” vençur fondlarının dəstəyi ilə ümumi məbləği 1.000.000$-dan artıq olan investisiya fondu yaradılıb.
Tədbirin ilk günündə rəsmi açılış nitqini SABAH.HUB İnnovasiya Mərkəzinin İcraçı direktoru Rəhim Bayramlı edərək tədbirin Azərbaycan və regional innovasiya ekosisteminə olan töhvəsindən danışdı Sponsor və tədbirdə iştirak edən qonaqlara öz təşəkkürünü bildirdi. Bundan əlavə, “İnnovasiyaların İdarə Edilməsi və Bilik-Əsaslı İqtisadiyyata Keçid” panelində İqtisadiyyat naziri Mikayıl Cabbarov, Elm və Təhsil naziri Emin Amrullayev, SOCAR-ın prezidenti Rövşən Nəcəf və PAŞA Holding-in aparat rəhbəri Dəyanət Sədullayev iştirak edərək hər sahəyə uyğun olan sualları ətraflı şəkildə cavablandırdılar.
“Baku ID” festivalının baş sponsorları qismində Elm və Təhsil Nazirliyi, SOCAR, PAŞA Holding, ABB və Mappable, tərəfdaşları isə 4SİM və İnnovasiya və Rəqəmsal İnkişaf Agentliyi çıxış edib.
Əlavə olaraq, tədbir zamanı “Al-Farabi Innovation Hub” ilə SABAH.HUB İnnovasiyalar Mərkəzi və Yüksək Texnologiyalar Parkı arasında memorandumlar imzalanmışdır. Həmçinin “Baku ID” çərçivəsində SABAH.HUB İnnovasiyalar Mərkəzi və 4SİM arasında ölkədə rəqəmsal iqtisadiyyatın inkişafı çərçivəsində yerli startap ekosisteminin inkişafına dəstək göstərilməsi və bu sahədə əməkdaşlıqla bağlı ikitərəfli anlaşma memorandumunun imzalanması baş tutub.
Qeyd edək ki, “Baku ID” innovasiya festivalı fəaliyyət dövrü ərzində onlarla startapın inkişafına dəstək verərək minlərlə şəxsin innovasiya ekosistemi haqqında birbaşa məlumatlanmasına nail olmuşdur. Ümumilikdə isə startapların 4 milyon dollardan çox investisiya cəlb etməsinə dəstək göstərmişdir.
“Baku ID” innovasiya festivalının fəaliyyəti ilə yaxından tanış olmaq və mütəmadi olaraq yeniliklərdən xəbərdar olmaq üçün sosial media kanalları (facebook, instagram və linkedin) vasitəsilə izləyə bilərsiniz.
Reklam hüququnda
