Abşeron rayonu Qobu qəsəbəsində sakinlərin göz xəstəlikləri üzrə pulsuz müayinəsi keçirildi - FOTO

"Bu gün Abşeron rayonu Qobu qəsəbəsində sakinlərin göz xəstəlikləri üzrə pulsuz müayinəsini keçirdik".

Bu barədə millət vəkili Nigar Məmmədova özünün “Facebook” səhifəsində məlumat paylaşıb.

"Vətəndaşların göz xəstəliklərinin pulsuz müayinəsi "Universal Hospital”ın peşəkar, yüksəkixtisaslı həkimləri tərəfindən həyata keçirilir. Müayinələrdə əsasən ehtiyacı olan ailələr iştirak edir. Müayinə ilə yanaşı həkimlər tərəfindən müvafiq məsləhətlər verilir, eynək və müalicə üçün reseptlər yazılır. Mən öz adımdan xəstəxananın baş həkiminə, eləcə də bütün peşəkar heyətə göstərdikləri dəstəyə görə təşəkkürümü bildirirəm. Əminəm ki, aksiyada iştirak edən vətəndaşlarımız tez bir zamanda şəfa tapıb, öz sağlıqlarına qovuşacaqlar.

Qeyd edim ki, aksiya Abşeron rayonu Hökməli qəsəbəsində də təşkil olunacaq.

Xüsusi qayğıya ehtiyacı olan vətəndaşlara dəstək dövlət siyasətinin əsas prioritetlərindən biridir. Uğurla reallaşan dövlət proqramları nəticəsində bu gün ölkə vətəndaşları səhiyyə sahəsində də ən yüksək xidmətlə təmin olunur. Prezident İlham Əliyevin əhalinin sağlamlığına diqqətinin göstəricisidir ki, son illər ölkəmizdə səhiyyənin maddi-texniki bazasının möhkəmləndirilməsi istiqamətində kompleks tədbirlər həyata keçirilir, ölkənin bütün regionlarında müasir xəstəxanalar, tibb məntəqələri fəaliyyət göstərir. Əhalinin sağlamlığının qorunması, dünya standartlarına uyğun tibbi yardımla təmin olunması ölkədə həyata keçirilən sosial-iqtisadi siyasətin tərkib hissəsidir. Bu istiqamətdə Heydər Əliyev Fondunun reallaşdırdığı layihələri, xeyriyyə aksiyalarını xüsusi qeyd etməliyik. Prezident İlham Əliyevin də söylədiyi kimi, ölkəmizdə dövlət siyasətinin mərkəzində Azərbaycan vətəndaşı dayanır. Bu aksiya da dövlətin həyata keçirdiyi nəcib təşəbbüslərə dəstək məqsədi daşıyır", - N.Məmmədovanın paylaşımında qeyd olunub.